veel bloets wt haren nase ende monde Twelc doe een priester inden geest bekende ende gaf haer tlichaem ons heren ende lietse wten kelck drincken
Het was een goede vrou die met deser maget sinte Jden begheerde eenen nacht te sijn, twelc si liet geschien Doe sach die vrouwe een hemels lichte op haer dalen, wt welcken lichte haer herte verlicht wert ende ontfinc een grote soeticheyt ende deuocie des geests.
Het was ooc een baghijne die dese maghet hadde ghenoot ter maeltijt. ende si en hadt niet te drincken dan bier mer biden gebede van sinte Jden soe verwandelde dat bier in goeden wijn.
Dicwil quamen die visschen inden water tot haren handen ende desghelijcx die voghelen
Si hadt een suster die hair quadertieren was ende bespottese Mer op een tijt sach die suster op haer dalen een hemels licht ende achter die tijt beterde si haer Daer na sterf haer suster haestelic, mer sint Jde mit haren heiligen gebede verwectse vander doot ende si leefde veel iaren dair na.
Het wert gheopenbaert enen deuoten monick der ordenen van premostreyt, dat hi ghelijc verdiente hadt metter eerwerdiger maget Jde, ende doe ginc hise visiteren ende doen kenden si malcander ende hadden voortaen een herte in god.
Op een tijt als si misse hoirde so sach si die gloriose maget Maria ende sinte Elizabeth met sinte Jan baptista, die een vat bracht met heten water. Maria ende Elyzabeth ontcleden dat kindeken Jhesum ende baydent. Daer na leydet Maria opten schoot van sinte Jden die Jhesum onthelsde Daer nae eyschte Maria die moeder gods hair kindeken weder, mer Jda en wouder niet af scheiden, ende waren aldus in minliken gheschille oft twist tot Agnus dei vander missen ende doe verschiet dat visioen
Dicwil gebuerdet dat si int ontfangen dat lichaem ons heren ouermits grote minne so weeck wert datse op hair benen niet staen en conde oft voort gaen.
Daer na ghincse totter ordenen van Cisteau int cloostere te Rosendale by Mechelen. Ende daer wert ghesien van vele haer medebroederen als si ten heyligen sacramente ghinc dat die moeder gods Maria ende sinte Jan euangelist haer leyden ende weder brachten.
Jtem haer biechtvader vraechde hair op een tijt of si niet met ydelre glorien getempteert en waer. Si antwoorde aldus Dat god die here mi gegeuen heuet die ouerdencke ic, ende dit ouertellende aenmercke ic als oft si mi niet gegeuen en waren, mer yemant anders, so geweerdicht mi de alre goedertierenste Jhesus te voortcomene met sijn benedijnghen. Mer vader ick bid v dat ghijt niemant kenlijck maken wilt dan wt saken van deuocien ofte yemants stichtinge mijnen naem verswigende.
Dicwil sachmen wt haer ogen licht schijnen als der sonnen licht Ende die susteren geuoelden wonderlike sueticheit wt haer gaen Ende somwijlen verstont si die scriftueren bi godliker inspiratien. Ende op sint Jan baptisten dach sach si dat gulden cronen den nonnen singende gegeuen werden. Ende die duuen aen der kercken wonende quamen tot hair als haer dat beliefde.
Ten laetsen als god haer van deser werelt verlossen wilde so wertse met eenen strangen coortse begrepen, ende ontfangende die heylige sacramenten so gaf si haren geest in gods handen,
Auteursrechtelijk beschermd