Van Brabant die excellente cronike

Dat .xxx. capitel Van sinte Jden van Leeuwen.

EEn ander maghet vander seluen name Jde was in Brabant, dye

[fol. 31r]

gheboren was wter outster stat van Brabant geheten Leeuwe. Haer vader was een eerwaerdich wijs man geheten Gilbert, ende haer moeder heet ooc Jda Ende hair dochter Jda was van ioncx op seer sachtmoedich onnosel ende goedertieren Ende als si .xiiij. iaren out was so begeerdese in meerder vriheit den coninc der glorien te dienen ende ginc int voorseide clooster te Rameyen in die ordene van Cisteau, daer si lange tijt gode diende in abstinencien, in oracien, in heylige wakingen, in silentien ende ander goddienstige wercken

Dese bruyt cristi so lange als si leefde ontfincse geerne dat heylich sacrament des lichaems ons heren wanneer si mochte in grooter sueticheyt haers herten diese dan gheuoelde Want op een tijt als si dat lichaem Christi ontfangen had, so berispte haer minlijck een nonne aldaer, om datse geen ablucie en nam wten kelcke Doen antwoorde sinte Jde aldus Als de heylige dieuuldicheit in mi verblijt ende die godheyt int herte iubileert ende mijnen geest een wert met mijnen gheminden Hoe meendi dan mijn suete suster, als ic dit geuoel dat ick den kelck gesmaken can Die selue suster vraechde haer Wat is die vereeninge metten gheeste gods, als die tesamen met haer ghemenget werdt Doe antwoorde die heylige maghet aldus. Ghelijck een dropel waters in een vol vat wijns, also ist dan

Als sinte Jde op een tijt eenen deuoten religiosen man een secreet dinc geopenbaert hadt so badt hi haer om orlof dat te moghen sommighe menschen voort te seggen Doe verboot sijt hem seggende datse haer seer ontsach den name van heylicheden ydelic te crigen

Naemaels bekende si den tijt harer doot te naken ende si begeerde tlichaem christi te ontfangen. Ende des ander dages daer na so beslootse haer heylich leuen met eenen saligen eynde verscheydende van deser werlt ende ontfangende den loon der eewiger glorien