Van Brabant die excellente cronike
(2016)–Anoniem Alderexcellenste cronyke van Brabant, Die–
Auteursrechtelijk beschermd
[Folio 24r]
| |
JNden tijden van Godefroot van bullion so leefde sinte Arnulphus dats sinte Arnout bisschop van Soison in vrancrike wt brabant geboren dit en is niet die grote sint Arnout die marcrgraue van Rijen was ende bisscop van Mets, daer hier na int tweeste boeck af geseit wert Mer het was die voorseyde sinte Arnout van soysson eerst een edel ridder seere bequame ende duechdelic van leuen. Ende so sijn legende seyt, doe sijn moeder hem droech ende si seer droeuich was so wert geseit tot haer in haren slape. waer om bistu droeuich, verblijt v want du draghes in dijn lichame een kint twelck god vercoren heeft ende tsal groot werden Ende dit gaf si na te kennen haren man geheeten Fulbertus met groter blijscap Ende si wert daer nae moeder van den kinde tot vruechde van alle haren vrienden, welck kint op wies in groten verstande ende wijsheyt, ende wert ridder also voorseyt is. Maer bi inspiratien des heylichs geests so wert hi beraden tot geesteliker ridderscap hem te geuen om eewighen loon te vercrijgen ende begaf hem ende wert monick in sinte Medardus clooster te Soysson, dair hi in groter enicheyt ende heylicheyt gode diende. Daer na wert hi van sijnen medebroederen abt ghecoren, ende voort aen so gaf hy hem allen een goet exempel van leuen mit woorden ende met wercken. Jn deser officien sijnde so corrigeerde hi dye wederspannige ende hi dede veel teekenen ende miraculen die siecken ghenesende, de blinden verlichtende. Ooc hadde hi den geest van prophecien. Daer nae soe gaf hi ouer sijn prelatuerscap vertijende dat regimente ende hi keerde hem weder totter enicheit vanden slote in groter abstinencien ende heylige wakinge ende gebeden hem daghelijcx oefenende in hogher contemplacien So dat sijn heylich leuen bekent wert van coningen ende princen ende ooc vanden paus Gregorius. die .vij. de welcke hem stelde te sijn bisscop tot Soysson.
Op een tijt als hi een kercke wyden soude so was daer een grote scare van volcke ende daer was ghebreck van vytalie, mer daer waren voor hem bracht vijf maten wijns Ende sinte Arnout sadt neder ende dat volc stont ontrent hem Dair gebenedijde hi tbroot ende den wijn, ende dedet al den volcke deylen, die alle ghenoech daer af geuoet waren tot groten verwonderen van al den volcke Van welken brode die somige met hem droegen ende gauen dat siecke menschen te eten die daer af seer verlicht werden Namaels ter begeerten ende bi rade vanden bisschop van Dornike geheeten Radtbodus ende ter beden van graue Robbrecht van Vlaenderen soe quam hi tot Ouborch in vlaenderen om te stichten die kercke van sinte Peters ende alder apostolen om een abdye daer af te maken. Ter welcker steden hi sijn leste raste nam, also hem dat te voren van gode verthoont was. Ende inder seluer kercken wert hi weerdeliken begrauen Daer na geschieden dair veel teekenen ende miraculen die god almachtich wrachte door sinen heyligen. want int iaer ons heren .M.C. ende .xv. so regneerden ouer alle tlant onder tvolc grote siecheden. Ende die siecke menschen quamen met grooter scharen tot sinte Arnouts graue leggende daer omtrent ende met grooter begheerten sijn hulpe | |
[Folio 24v]
| |
aenroepende soe dattet van April tot half Oogst als sinen dach valt meer dan lx. siecken ghenesen werden sonder alle dander dier onbekent waren ende ooc nochtans hulpe ende ghesontheyt ouer midts die verdienten vanden gloriosen vrient gods sinte Arnout hebben vercregen Des gelijcx int nauolgende iaer, so dat van Meye tot oogstmaent noch ander vijftich menschen door sinte Arnout alle ghesont werden van allen siecten hoe datse waren Veel ander teekenen leestmen van den heyligen man sint Arnout in sijn legende, hoe dat hem god met veel tekenen ende miraculen verciert heeft, also sijn legende dat claerlijken betugende ende verclarende is. Waer bi een yeghelick goet kersten mensche wel verwect mach werden om hem met groter neersticheyt te dienen ende te eeren want hi een groot vrient gods is, alsoe dat hier voor ghenoech geseyt ende verclaert is. Ende sijn dach comt opten .xv. dach van September |
|
