Van Brabant die excellente cronike

Dat .xix. capittel. Van sinte Gommaer van Liere den heyligen confessoor.

SJnte Gommaer was van edelen geslacht gheboren ende op geuoet in Brabant te Embleem, die van sijnre iuecht hem keerde vander ydelheyt der werlt ende keerde sijn herte tot gode Hi was goedertieren, sachtmoedich, ende ootmoedich, castijende sijn vleesch mit abstinentien ende een milde gheuer van aelmoessenen Dese heilige iongelinc wert van sinen ouders geleyt totter salen des conincx Pippijn die des groten coninc Karels vader was, hoe wel nochtans hi lieuer had bi hem seluen in enicheden te dienen den oppersten coninc der glorien. Ende so was hi ontfanckelic den coninc Pippijn ende oec bemint van al den heren des conincliken pallays om sijnre doghet ende wijsheit. Onlancx daer na so wert hi gheeert met eender officien die hem die coninc gaf, dien oec dwanc een wijf te trouwen gheheten Grimmare

[fol. 21r]

die hem seer onghelijc van zeden was. Want ghelijc sinte Gommaer sachtmoedich ende ontfermhertich was, so was si wreet ende ongenadich Want als hi een lange tijt nae des conincx beuel wten lande was beuelende dat de regemente van sinen huse Grimmare sinen wiue so was si grote wreetheit hanterende ouer sijn knechten ende ondersaten, die berouende van haren goeden ende quellende met harden slagen ende dedese trecken den ploech ende haer hare af sniden.

Op een tijt so beual sinte Gommaer hem seluen gode almachtich ende hi reysde na Rome waert Ende tgheuiel dat den eersten nacht sijns weges so openbaerde hem die engel gods seggende tot hem. O Gommaer ic ben een van god ghesonden, ghi hebt gheschict te Rome te gaen ende die apostolen te visiteren, mer god is al omme tegenwoordich ende sijn ogen sien in allen steden, Ghi sult desen wech laten ende niet verre van deser plaetsen sult ghi een bedehuys timmeren ende die boomen sulstu wtroeden, daer sult ghi leuende dijn woninghe hebben ende na dijn doot dijn ruste Mer weest volstandich ende neerstich in goeden wercken sekerlic wetende ist dat ghi volherdet so suldi comen in dat gheselscap der engelen, ende den loon des ewich leuens sult ghi ontfanghen voor uwen tijtlijcken arbeyt So dede sinte Gommaer na dat beuel des engels ende ter plaetsen hem gewesen so dede hi de bomen ende dornen wter aerden ende timmerde daer een kercke in de eere van sinte Peter. Jn de welke hi altijt gode dienende ende wakende was in deuoten gebede metter herten op gheheuen ten hemelwaert, ende sijn leuen gelijc makende na dat exempel ende leuen vanden heyligen

Sinte Gommaer dede oec in sijn leuen blijckelike miraculen. Op een tijt als hi eenen boom af gehouwen hadde daer een man sijn clachten af dede soe vergaderde hi den boom weder in sijn stake wassende als ofter noyt aen gehouwen hadde gheweest

Jtem op een tijt was een serpent gecropen in die keelen van eenen kinde, ende den steert vanden serpente sachmen stekende Ende sinte Gommaer maecte daer een gat ende track dat wte, ende dat kint wert ghenesen

Als den tijt quam dat god sinen vrient sinte Gommaer van deser werelt nemen wilde so begonste hi cranc te werden, ende hi geuoelde wel dat den tijt sijns verscheydens nakende was ende hi sterf seer deuotelic seker sijns loons, ende die siele wert opgheuoert vanden engelen goods totten oppersten ende hemelschen Jherusalem opten .xi. dach van der maent October

Dat heylige lichaem van sinte Gommaer binnen corten iaren daer na is beuonden gheweest begrauen in die voorseyde kercke van sinte Peter staende te Liere bi die grote kercke daar de translatie af geschiede met groter solemniteyt ende deuocien des volcs in die selue grote kercke, te weten inden iare M.CCCC.lxxv. Ende sint dier tijt sijn daer ontallike miraculen tot nv toe geschiet door die verdiente van sinte Gommaer van alrehande siecten genesende die hem met ynnigher herten visiteren, also dat niet alleen in Brabant mer in veel ander landen verre bekent is.