Een Aemstelredams amoureus lietboeck
(1589)–Anoniem Een Aemstelredams amoureus lietboeck–
Auteursrechtvrij
[pagina 154]
| |
Trueren so moet ick nacht ende dach
Ende lijden also groot verlanghen,
Om een de Liefste de ick oyt sach
Sy heeft mijn hart in haer ghevanghen,
Doorschooten heeft zijt also menichvout
Sy heeft mijn Hart in haer ghewout,
Na haer staet mijn verlanghen.
In wat plaetsen dat ick ben
Sy staet in mijn ghedachte
Daer en mach geen lieuer liefken comen in
By daghe noch oock by nachte,
Dat heeft haer claer anschijn ghedaen
Wout sy my in haer harteken ontfaen,
So waer al mijn lijden sachte.
In alle dese Werelt wijt //
En weet ick geen //
O Lief als ick anzie haer anschijn
Daer af neme ick al mijn gherief,
Maer lacen als ick van hier moet zijn
So is alle mijn blijtschap pijn
Ick en doe niet dan suchten en beuen.
Helpt rijck Godt hoe wee is my,
Als ick van haer moet scheyden
Och mochten wy wesen van clappers vry
So waer mijn harte ghenesen
Sy brengen die menige in swaer verdriet
Schout quade Tonghen waer ghyse siet,
Sy sijn so valsche ghepresen.
Clappers moeten clappers zijn
Ick wilse gaen laten varen //
Ende schencken die alderliefste mijn //
Thien duysent goeder jaren //
Sy is die liefste op alle aertrijck
Ick wilse gaen dienen ghetrouwelick
Godt wil mijn Liefken bewaren.
Helpt rijck God heere hoe wee is my
Als ick van haer moet scheyden
Trueren ghy blijft my altoos by //
God wil mijn Liefken geleyden //
Al is mijn auontuere dus cranck //
Ic hope het sal beteren eer yet lanck //
Den tijt moet ic verbeyden.
|
|