Een Aemstelredams amoureus lietboeck

Een nieu Liedeken, Op de wijse: Cupido triumphant.

Ick weet een reyn Casteel,
In een seer schoon landouwen,
Noyt zuyuerder juweel,
Die mueren zijn van gouwen
Cantelen alte mael
Japphyns orientael,

[p. 89]

 

t'Fondament is van Cristael.

 

 

 

Rontom dat schoon palleys

 

Daer stroomt een schoon Riuiere,

 

Het isser altijt pays

 

Men hout daer goe maniere,

 

Mocht eens smaken de vloedt

 

Vant dat Riuierken soedt

 

So sou mijn ionchart scheppen moet.

 

 

 

Die Brug is excelent,

 

Seer constich bouen maten

 

Ghewrocht op water ient

 

Van gout en Silueren platen,

 

Carbonckel stenen pleyn

 

Oock peerlen groot en cleyn

 

En Schapieren ghesleghen reyn.

 

 

 

Die Poorten van dat slodt

 

Zijn weerdich om Lauderen

 

Voor trouwelijckste lodt

 

Machmen estemern,

 

Als sijn Robijnen root

 

End' oock Diamanten bloot,

 

En Ammarauten zijn sy groot.

 

 

 

Op die Riuieren cant

 

Staen Fiolierkens groenen,

 

Gout-bloemkens oock gheplant

 

En Olijftacxkens groenen,

 

Wt gonsten versaemt snel

 

Groeyt dit in deuchden wel

 

Zijt gratieus deur tgeest bevel.

 

 

 

Al noem ick int ghetal

 

Niet meer dan dees drie spruyten,

 

Men noemtse noch met al

 

Zeer ghoet van virtuyten

 

B[l]oemkens noch cruyt men vint,

 

Het is daer wel bekint

 

Tis recht datmen dat Slodt bemint

 

 

 

Binnen Casteel playsant

 

Staen lustighe salen,

 

Blinckende triumphant,

 

Schoonder dan gulde schalen

 

Die vreest des HEren wedt

 

Heeft Godt daer in ghesedt

 

Wijsheyt en is daer niet beledt.

 

 

 

Trou en beleeftheydt

[p. 90]

 

Wort oock aent Slot bevbonden

 

Liefde daer niet en scheydt

 

Zeer zuyuer ist van gronden,

 

Tis weert lof eere en prijs

 

Graciues is zijn aduijs

 

Het is een Hemels Paradijs.

 

 

 

Dit Slot hoghe vernaemt

 

Dat is een Maghet pueren,

 

Sy en wert noyt beschaemt

 

Al zijn haers nyders stueren

 

Wou my dat edel graen,

 

Voor haer dienaer ontfaen

 

So waer mijn trueren heel ghedaen.

 

 

 

Viel mijn doch dit gheluck

 

Dat zy my consent ghauen

 

Te spreken zonder druck

 

Dees maecht daer ick om slauen

 

Ick hoop dat zy sal

 

Blussen my groot misval

 

En my troosten int eertsche dal.

 

 

 

Edel Princesse weert,

 

Moet ic v aenschijn deruen

 

So sal desen droefheyt sweert

 

My truerich hert duerkeruen,

 

Dus gheeft my Liefken raet

 

Reyn bloemken delicaet,

 

Die v bemint in Liefde staet.