Een Aemstelredams amoureus lietboeck
(1589)–Anoniem Een Aemstelredams amoureus lietboeck–
Auteursrechtvrij
[pagina 8]
| |
Aenhoort t'geclach o bloeyende ieucht
Die v vermaeckt in ydele vreucht,
En Spieghelt v vry
Neempt exempel aen my,
Dewijl ghy meucht.
Ick heb wel eer ghetriumpheert
Wellust des Vleyschs altijt begheert,
Met vrolijck iolijt,
Na des Werelts tijt
T'welck haest verkeert.
Dansen en spelen heb ick ghesocht
Mijn tijt in ydelheyt ouer ghebrocht,
Tis my nu wel leet,
Maer God is diet weet,
Waer ick om docht.
Bancketeren en vrolijck te zijn
Lieffelick aenschouwen mijn liefs anschijn
Dat was voorwaer,
Mijn vreucht eerbaer
Mijn Medecijn.
Maer het is eylaes te zeer verkeert
Ick die de Werelt so heb gheeert,
Vint mijn nu in noot,
Deur den wreden doot
Die mijn turbeert.
Wat ick aenschouw tis mijn al pijn
t'Gheen my wel eer vreucht plach te zijn
Dus ben ick ontrieft,
Maer alst Godt belieft
Salt anders zijn.
Niet isser dat ick mijn meer beclaecht,
Dan dat ick die Werelt dus heb behaecht
Die zo lieffelijck toont,
Maer soo bitter loont
Twelck my deur-knaecht.
In mijnen fleur wort ick ghepluckt,
Ghelijck een Roose door ongeluckt
De-wijl hy staet
En bloeyt zeer delicaet,
Wort aff ghepluckt.
Tis een quaet fondament daer hi op bout
Die hem op aerdsche vruechden betrout,
Want die felle doot //
Spaert cleyn noch groot //
Jonck noch te oudt.
| |
[pagina 9]
| |
Hercules zo zeer vermaert
Sloech slangen en draecken metten swaert,
Deur zijn grote cracht
Te niet ghebracht,
Is niet ghespaert.
Cresus die rijckste des Werelts wijt,
Salomon in wijsheyt onbenijt,
Sijn alle ghevelt,
Deur des doots ghewelt
In corter tijt.
Hertog van Troyen zeer valiant
Achillis die vroomste van Griecken lant
Zijn alle verghaen,
Met Helena schoon ghedaen
En Paris playsant.
Die niet beweecht is als een steen,
Ick zie d'exempel int ghemeen,
Wantmen niemant en vant
Die den doot verwant
Dan Godt alleen.
O doot o doot, brengt v propoost
Dat ick van druck mach werden verloost,
Tot God den Heer,
neem ick mijn keer,
Hy is mijn troost.
Adieu adieu, druck fantazy
O princelicke iuecht gedenckt dit vry
Want een Roose die bloeyt
Wort haest ghesnoeyt
Als ghy ziet aen my.
|
|