Een Aemstelredams amoureus lietboeck


Een Amoreus Liedeken. Al waer ic half doot Ja met fenijn vergeuen Door v schoon Lief mijnioot Soude ick vercrijghen tleuen, Maer sonder v schoon lief verheuen, Al waer mijn Hart noch so ghesont // In corter stont sou metten strael des doots werden ghewont. Want mijn hart siel en lijf Rust Lief op v ghenade, V knecht ick eeuwich blijf, Al vielt tot mijnder schaden Maer v goetheyt wijs van beraden, Voorcomen sal alsulcx verdriet // Dat hoop ick niet Door trou en eer die mijn van v gheschiet. Menighen tijt certeyn Gae ick mijn occuperen, Om v liefden reyn, Wel te recumpenseren Tot dancbaerheyt sterckt mijn begheren, Geen dinck en valt mijn al so swaer // O Lief eerbaer, Als v absentie teenigen tijt dats claer Want al swerelts iolijt Staet mijn als droefheydt tegen. Daer ghy lief niet en zijt. In wient al is gelegen Sonder v ick geen vreucht can pleghen, Dat sal ic tonen metter daet Lief delicaet // So lang der asem wt mijn monde gaet. Deuchtsame schone vrou Princes waert om beminnen, Blijft v dienaer getrou Verandert niet van sinnen,
[pagina 3]
Laet v van geen opziers verwinnen, Mijn Liefde en sal tot geender tijt, T'zy wiet benijt Vergaen voor dat die doot Ons t'leuen slijt.