Souterliedekens

§ Den Pater noster Mat. int .vi. cap. Na die wijse Het ghinghen drye ghespeelkens goet. Spaceren in dat wout, Sij waren alle drye beuroet. Soectse vore opten. C.ix. psalm.

UAder ons dye bist in hemelrijck ⁺
Maect ons ghebet bequaem
Wij roepen tot v alle ghelijck
Gheheylicht si dinen naem

Dijn rijck laet ons gheweerden ⁺
Dijn glorie laet ons sien
In hemel so oock op eerden
Moet dinen wille gheschien

Gheeft ons heden ons dachlijcx broot ⁺
Schelt onse schulden quijt
Ghelijck wij doen ons medeghenoot
Al hier op deser tijt

Leydt ons in gheen temptacien ⁺
Van tquade maect ons vry ⁺
In onser tribulacien
So staet ons allen by

Want v alleen behoort dat rijck ⁺
Die cracht ende heerlijcheyt
V wtuercoren sekerlijck
Hebt ghi dat toe bereyt

+ Pater noster qui es in celis sanctificetur nomen tuum

+ Adueniat regnum tuum. Fiat voluntas tua sicut in celo et in terra.

+ Panem nostrum quotidianum: da nobis hodie, & dimitte nobis debita nostra: sicut & nos dimittimus. &c

+ Et ne nos inducas in temptationem.

+ Sed libera nos a malo.

+ Quia tuum est regnum virtus et potentia in seculorum secula. Amen.