Poëmata

[p. 254]

Ad F.F.W. Profitentem.

ARdet infelix Sodome, peritq́ue
Sulphuris foedo tumulata busto,
Et licet tardè, tamen esse iusta

Numina sentit.

Lethus à Diuis monitus benignis
Praeuenit cladem catus imminentem,
Praeuenit promptum nimium furentis

Fulmen Ihouae.

Et fugit velox citò diruendum
Horridum sacri sceleris lupanar,
Nec tamen totus fugit, infidelis

Restat Iphille.

Illa dum vecors vetitos ad ignes
Non satis cautos oculos reflexit,
Induit duram silicem, nec vltra

Saxea vidit.

Mundus infamem Sodomen secutus
Prouocat lentos superos, suisq́ue
Non sinit culpis Nemesin volentem

Ponere fulmen.

Gaudet infelix, neque gaudiorum
Prospicit finem tragicum suorum,
Nec scit imprudens, lateat quod istâ

Anguis in herbâ.

Tu nimis vani breue schema saecli,
Et nouae luxum Sodomis relinquens

[p. 255]

 

Praeuenis foetam Domini Tonantis

 

Callidus Iram.

 

Perge Fulgenti facie irretortâ,

 

Et caue spreti meminisse mundi,

 

Grande in exemplum tibi curiosae

 

Sors sit Iphilles.