Poëmata

[p. 250]

Ad. D. Virginem.

QVam legit Eois diues Nabathaeus in vndis

Pulchra peregrino gemma colore placet.

Quae regit immensum violentis legibus orbem

Pulchra micat Lydis, aurea vena vadis.

Dulce nitent violae, primi dum tempore veris

Pulchrae formosas explicuere comas.

Quae nimijs mundum prohibent horrere tenebris

Pulchra sub obscurâ sidera nocte micant.

Solq́ue renascentis Princeps & causa diei

Pulchrum lucifero vibrat ab ore iubar.

Et rosa quae nares geniali pascit odore,

Pulchra dionaeo sanguine tincta rubet.

At tu Virgo Parens praefulges pulchrior omni

Gemmâ, auro, violâ, sidere, sole, rosâ.