Poëmata

[p. 107]

Nobilissimo et amplissimo V. Francisco de Kynschot regiae maiestatis Consiliario, & AErarij Belgici Thesaurario Generali.

MAgne Vir, omnipari non infima gloria Belgî,

Quem Themis, & Phoebus doctaq́ue Pallas amant;

Ardua qui summi curas aeraria Regis,

In dubioq́ue tuam non sinis esse fidem:

Accipe quae tragico tentaui pauca cothurno

Carmina, praesidio sint ea tuta tuo.

Parua quidem, magnoq́ue damus minus apta patrono,

Et vix indicij digna fauore tui.

Sed mage felicem dum me vetat esse Poëtam

Melpomene studijs non satis aequa meis;

[p. 108]

 

Dumq́ue minus fausto radiant mihi sidera vultu,

 

Nullaq́ue Pierias Musa ministrat aquas.

 

Tu pauidae monumenta pius defende camoenae,

 

Et facilem praesta, quam nequit auctor opem.

 

Scilicet est aequum teneros non spernere vates,

 

Et timidae dubium flectere nauis iter.

 

Hoc decet & studiis, & tanto nomine clarum,

 

Hoc decet ingenij numina diua tui.