Tvoyage van Mher Joos van Ghistele

(VII, 11)

[D]us commen zijnde ter voorseyder steden van Tauris ende daer sejournerende diverssche daghen, zo warden zij gheleedt vanden coopman daer mede zij commen waren, ten diversschen waerften omme de stede te visiteerne. Ten eersten waren gheleedt ghenouch in midden vander stede duer vele schoone besaren, twelc verwelfde ende bedecte straten zijn (330v) van coopmanschepen, toot eenen besare dat tuutnemenste van al es, daermen alle costelicheden te coope vindt, zo constelic ghemaect ende ghescildt van gaude, laizuere ende alderande verwen, dadt ongheloovelic ware om zegghen. Over beede zijden zo vele boteghen ende wijnckelkins ronts omme deen an dandere staende, dat zij niet tellicken en zijn, de welke den coninc jaerlicx weert zijn een onsprekelic goed, ende es ghenaemt Le Besastan, twelc dede maken eene coninghinne, huusvrauwe des conincx lest overleden, dochtere vanden keyser van Trapesonde, die daer int land zeer wel bemint was.⁵⁹ Zij hilt tkersten gheloove naer de Griecsche maniere, dat haer de coninc ghedooghde, ende van haren weghe zo eist noch dat de kerstenen daer int land niet zo qualic ghemint en zijn als in anderen landen. Item van haer en bleef gheen hoyr, maer es te wetene dat naer de machometaensche maniere de heydenen vier wijfs ende huusvrauwen hebben moghen, ende emmers zo was daer eene andere de welcke eenen zone hadde bijden coninc, die nu gheweldich coninc es van Perssen.⁶⁰ Item over deen zijde vanden besare staet een tscoonste chaen datmen dijncken mach, met zo meneghe camerkins deen boven den anderen dat wonder es, al met alleyen pantwijs ghemaect, ende onder es wel plaetse omme twee dusent paerden ende dieren, al verdect met vauten; daer mach elc een camer nemen die wilt om een ghestect ghelt, weder hij heyden zij, (331r) ydolatre oft kersten, ende al dat hij daer in brijnct es alzo wel bewaert oft hijt thuus hadde; dit zelve dede ooc de voornoemde coninghinne maken. Ende over dander zijde, jeghen over, zo zijn de principale baden vander stad, dat eene vremde zake es om sien, want daer esser diverssche, eeneghe zeere heet, andere wat coelder, eeneghe recht lau, ende zo voort van allen soorten zulc alsmen begheeren can. Dese baden zijn zeere uutne-

59 Bedoeld is de Despina Catherina, een dochter van Johan IV die 1446-1458 keizer van Trebizonde was. David, de laatste keizer, huwelijkte haar uit aan Uzun Hasan, Khan van de Witte Schapen om aldus steun te verwerven in zijn strijd tegen de Turken. Uzun Hasan overleed in 1478.

60 Ya'kûb Bey, die van 1478 tot 1490 regeerde.

[p. 338]

mende costelic ghewracht van steenweercke met costelicken trappen daer in gaende, de welke de voorseyde coninghinne al hadde doen maken. Insghelijcx zo worden zij gheleedt, wel een huere gaens, ter plecken daer eene schoone moskea staet, ligghende ghenouch up thoochste hende vander stede; daer commende zo vindtmen eene schoone, groote, viercandtte plaetse, vul van allen fruytboomen. Daer in midden es eene schoone cisterne oft eenen vivere ware, ronts omme al bemuert ende up den bodem ghepaveert met witten steenen, blinckende als een snee, ghemaect met langhen breeden trappen ingaende, groot int ommevanghen vijf hondert vademen, ende daer es ghemaect van buuten onder deerde water in commende, omtrent eens mans lijngde diepe, dat weder duer een ander conduut uut loopt, zo datment dicwil verversschen mach, ende hier mach hem elc in baden die wilt. Item alle dese voorseyde plaetsen ende moskea zijn ronts omme int viercantte bevrijdt met eender langher alleyen, boven al ghevauteert pantwijs, de scoonste diemen ter (331 v) weerelt vinden mach, zo datmer altijts drooghe onder gaet, de welke ghesustineert es met vijf hondert costelicke pilaren van albaesteren, redelic hooghe ende weerckelic ghewracht, daermen te coope vindt van allen saladrien, confectien, zoeten cruden, vele goeder delecater drancken die zij daer zeere useren, ende van aldertiere zoeter verversschinghen diemen dijncken mach; het schijnt daer rechts altijts een keermesse wesende, want alle die panden ronts omme zijn vul van speellieden met diversschen instrumenten, vele gokelaers, tafel speelders, vele spraecsprekers ende van zulcke manieren van volcke, dwelcke eene ghenouchelicke sake es tansiene ende anhoorne. Dese maniere van doene duert daer drie maenden tsiaers, te wetene wedemaent, hoymaent ende ougstmaent. Den meesten deel vanden straten zijn alle besaren ende straten van coopmanscepen, zom verdect, eeneghe onverdect, daer zo groot volc converseert dat onmoghelic ware om zegghen. Item in dese voorseyde stede en zijn de huusen zo verstopt niet als zij t'Alkayeren zijn, ende hebben vele meer lochtijncx achtere ende vooren dan zij in andere steden doen; daer zijn ooc wonderlicke vele watermuelenen, maer boven alle saken zo es thaut daer uutnemende diere, zo datment metten ghewichte vercoopt ghelijcmen andere ware doet.