Tvoyage van Mher Joos van Ghistele

(II, 45)

[O]mme voort te sprekene vander gheleghenthede van diere maertsen, zo salmen weten dat tusschen den oorspronc ende uutloopende beken vanden voorseyden

[p. 127]

tween fonteynen eene groote versaminghe van huusen leyt, daer tanderen tijden eene schoone, stercke (131v) stede ghestaen heeft, ghenaemt Cesaria Phelippi, de welke oec te heetene plochte Paneas. Oec heeft die stede altemet ghenaemt gheweest Belena oft Lesen oft oec Enope, ligghende ghenouch in eene wilde, boschachteghe maertse, daer omtrent in eeneghe deelen ghenaemt Cogoghar.³⁹² Te deser stede zo stelde Jeroboam, de coninc van Ysrael, ooc een van zijnen vergulden calveren, dwelc hij den volcke dede anbeden, ghelijc daer af staet ten derden boucke vanden Coninghen zo vooren gheseyt es. Oec in dese zelve stede zo ghebuerdet dat Ons Behouder Jhesus vraechde zijnen discipulen: ‘Wat zeghet tvolc vanden Zone des menschen wie dat Hij es? ‘Daer up eeneghe andwoordden: ‘Sent Jan Baptiste’, andere: ‘Elyas’, andere: ‘Een vanden propheten’. Doen seyde Ons Heere: ‘Ende ghij Pieter, wat seghdi?’ Daer up Sente Pieter andwoordde: ‘Ghij zijt Christus die levende Gods Zone’, ende ter zelver stede beloofde hem Onse Heere stedehauder te wesene over de heleghe keercke, zegghende: ‘Tu es Petrus’ et cetera, alzomen daer af leest in devangelie van Sente Matheeus int xvi^e capitele. Item zuutwaert buuten deser stede zo vergaderen de voorseyde twee fonteynen in een, ende zo versaemt zijnde, commen in een groot, breet lac, meerder dan eeneghen staenden viver, ghenaemt de wateren van Meron,³⁹³ maer es bij tijden inden zomere wel naer drooghe. Up den houver van desen wateren zijn in tijden voorleden diverssche groote strijden ghebuert, want zomen leest ten boucke van Josue int xi^e capittele, zo verwan (132r) de zelve Josue daer den coninc van Azor, ghenaemt Jabin, met velen anderen coninghen die tzijnder hulpe waren commen. Oec onttrent den voorseyden wateren zo gheschiedet dat Abraham achterhaelde de coninghen die ghevanghen hadden Loth zijnen neve, ende gherooft de vijf steden die naermaels versoncken, ter welker tijt hij den zelven verloste, weder nemende den roef ende zoo thuuswaert keerende met victorien, doen hem Melsisedech offerde broot ende wijn, zomen daer af leest ten boucke van Genesis int xiiii^e capittele, ende te dier vorseyder plecken zo logiert men oec ghemeenlic. Dus alle dese voorseyde plecken ghesien ende ghevisenteert hebbende, zo keerden de voorseyde weder zonder eenich belet oft verlies ter stede van Jherusalem, ende hadden tien daghen uut ghezijn, schinckende hemlieden³⁹⁴ eene goede courtoisie zo dat zij zeere wel te vreden waren.

392 Belena oft Lesen: deze onjuiste identificatie van Caesarea Philippi (d.i. het Baal Hermon uit Rechters 3:3) met Lesem of Lais, de oude naam van het naburige Dan (cf. Josue 19:47), kwam wel vaker voor, bv. bij Willem van Tyrus, XV, 9 en bij Burchardus, III, 4. Cogoghar: bij Willem van Tyrus, XV, 9 heet het gebied Cohagar.

393 Baharet-el-Houléh.

394 De drie Bordelese mammelukken, genoemd in Tvoyage II, 36.