Tvoyage van Mher Joos van Ghistele

(II, 43)

[D]us de voorseyde commen zijnde ter voornoemder stede van Sofet, zo ghinghen de mammeluucken ende dandere logieren int casteel van huerlieder heere, twelc (129r) een zeere steerc casteel es, ligghende up eenen beerch, daer men hemlieden zeere groote chiere dede naer de maniere van dien lande, ende snavonts ghinghen zij inde stede bancketeren, bezouckende diverssche huusen daer zij kennesse had-

[p. 125]

den; God weet wat daer bedreven wart. Item in tijden dat Godefroit van Bullion ende zijne naercommers hilden dland van beloften, zo wart dit voorseyde casteel int hende toegheleyt den templiers, de welke met qualic bewarene datte verloren, ende quam zo inden handen vanden souldaen. Ende corts daer naer zo wart de voorseyde soldaen meester van gheheel Galyleen, van Sabulon, Neptalim, van Assur, van Ysakar,³⁸³ ende zo toot Sijdon, dat alle provincien zijn onder dlant van beloften gheleghen, ende oec van Akers ende Sur. Item van daer scheedende ende voort reysende ter zee waert an van Galileen, zo quamen zij teenen dorpe, ghenaemt Menien,³⁸⁴ ende wat ter rechter hand zomen uut den doorpe comt, up den rechten wech van Damasco te Jherusalem waert ende up de slincke hand, zo toochtmen den put daer Joseph, Jacops zone, van zijnen broeders inne gheworpen wart, eer dat zij den raet schoeren hem te vercoopene, ghelijc men daer of leest ten boucke van Genesis int xxxvii^e capittele. Van daer voort rijdende lancx der zee van Galileen, zo comt men an eenen houc teender plaetsen, ghenaemt Bethsayda, dwelc als noch eene goede, behuusde plaetse es, ligghende wat ter rechter hand (129v) des weechs, ende van daer waren gheboren Sente Pieter, Sent Andries ende Sente Phelips, alle appostelen Ons Liefs Heeren. Oec bijder voorseyder plecken zo comt een cleen waterkin ghevallen inde Zee van Galileen, ghenaemt de Cleene Jordane.³⁸⁵ Ende niet verre van daer up den houver vander zee, ter rechter hand vanden weghe, es de plecke daer Onse Heere Hem openbaerde naer zijne verrisenesse voor zesse van zijnen discipelen die aldaer alden nacht ghevischt hadden ende niet ghevanghen, maer ter stont als Onse Heere Hem vertoocht hadde, vinghen zo vele, goeder, grooter visschen, dat zijs ghenouch hadden. Van welken visschen de specie inde voorseyde Zee van Galileen als noch ghenouch es, ende zijn ghenaemt tabranen ende tsaroven, ende schijnt oft zij gheene rugghen en hadden, zomen hier of leest in devangelie van Sent Jan int xxi^e capitele.

383 Cf. Exodus 1:1-4.

384 El Minyele; het is dezelfde plaats als Helminuwe in Tvoyage II, 40.

385 Wadi Djoramâyah.