Tvoyage van Mher Joos van Ghistele

(II, 34)

[L]atende dese voorseyde plaetse ende voort rijdende naer Jerico, zo es de valleye zeere belemmert met rijsen ende struucken, maer van Jerico voort zo es zij bloeter, zeere sant- ende steenrootsachtich. Item Jerico plach te zijne eene zeer schoone, groote stede, gheleghen in eene cleene planure van goeder maertsen;³¹¹ nu ter tijt es zij zo vervallen ende te nieuten, datter niement in en woont, maer teender plecken daer bij staen en lettel huusen daer wat heydenen in woonen. Te deser steden hebben gheschiet wonderlicke saken, want zomen leest int bouc van Josue int tweeste capitele, zo was daer eene vrauwe, ghenouch van ghemeenen levene, ghenaemt Raab, de welke bescudde de bespiers vanden volcke van Ysrael die Josue daer ghesonden hadde, welke tooten spiers seide: ‘Ic weet wel dat ghijlieden dese stede winnen zult, daer omme biddic hulieden duer de (113r) vriendschepe

311 Het bijbelse Jericho lag evenwel ong. 2 km noordelijker, op een berg (Vilnay, 174-175).

[p. 111]

die ic u nu ghedaen hebbe, dat ghij mij ende de mijne dan wilt bescheermen’. Zij dat hoorende seiden: ‘Ghij zult hanghen ande veinstre van uwen huuse ende van uwer vrienden huusen eenen rooden draet, ende waer wij dien sien daer en zullen wij gheen quaet doen’. Dese voorseyde stede wart ghewonnen bij mirakelen want de muren vielen zonder slach ende zonder stoot, zomen daer of inde bible wel breeder bescheet vint. Van welker Raab ghedaelt es Onse Lieve Heere Jhesus, alsomen dat claerder bevinden mach in devangelie van Sente Matheeus in deerste capittele. Te deser zelver stede plach te woonene een prince vanden publicanen,³¹² ghenaemt Zacheus, die eens met grooter neerensticheden up eenen boom clam om Onsen Heere te siene, mids dat hij zo curt was dat hij over tvolc niet ghesien en conste, zomen daer af breeder lesen mach in deangelie van Sente Luuc int xix^e capittele; men toocht daer als noch de mueren van zijnen huuse. Ende daer de stede plach te stane eist nu zeere belemmert met diversschen boomen, zonderlinghe zo staen daer eene maniere ghelijc dooren boomen daer vruchten up wassen alzo groot als azelnoten, inhebbende cleen steenkins, zeer lieflic van smaken;³¹³ men vindt daer oec boomen, vruchten draghende als prumen, ooc zeer smakelic ende goet; ooc zijn daer boomen als struucken van ouden vliendren met luttel bladeren, appelen draghende alzo groot als caetseballen, zeer schoone ter ooghen, gheluwe als dore van eyeren, maer als mense open snijt, zo en esser binnen anders niet dan water (113v) saetachtich ende vule pluusinghe, qualic riekende;³¹⁴ daer onttrent zijn ooc vele fighe boomen ende van appelen van garnaten.

312 D.wz. hoofd der tollenaars; cf. Lucas 19:2: ‘Et ecce vir nomine Zachaeus: et hic princeps erat publicanorum (...)’.

313 Misschien is de wilde olijfboom (Oleaster) bedoeld, waarvan de takken inderdaad doornen hebben.

314 Bedoeld zijn de Sodomappels; ze komen in Tvoyage II, 52 uitgebreid ter sprake.