Borgerliicke Huyshouding
(1628)–Lucas Zasy–
[Folio B1v]
| |
Of zijt ghy van de knecht, ghy weet wel wien, bedroghen?
En wert ghy van yemant met waerheyt overloghen?
May.
Och lieve knecht. Ten is dat eyer eten niet,
Men kan soo segghen niet, al watter wel gheschiet.
Ghy weet wel beter Roel: maer wacht u voor de Katten,
Die niet en meeuwen, en still’ swijghende toevatten
Roel.
Ghy hebt seker ghelijck. Maer seght my, wat u let:
Want door uw’ ontsteltheyt ick oock mijn selfs ontset.
May.
Roel, luystert, ick sal u de fijne waerheyt segghen:
’K weet langher met mijn Broer te eren noch te egghen.
Roel.
Wel lieve Meyt, hoe dit, hy leeft nochtans wel kuys,
May.
Ia, alst al is gheseyt, tusschen galgh en ’t Gasthuys.
Roel.
Ey, swijght van hem doch still’: want ick sie hem verkeeren
Met goede vrome lien, diemen met recht moet eeren.
Daer toe verschijnt hy oock niet selden inde Kerck,
En wie soud’ dit, of dat schelden voor een quaet werck.
May.
’Tis maer schijn-heylicheyt, waer door hy goede luyden
Misleyt, die all’ sijn quaet noch steets, ten goeden duyden.
Roel.
Ghy zijt de Drommel, May, en achter toeghenaeyt.
May.
Wat meynt ghy datmen my met schijn van deughde payt,
Hy comt somtijts ter Kerck, is voor int oogh gheseten:
Maer twelck hy daer dan hoort, heeft hy wel haest vergheten,
Wanneer hy ’s daeghs daer naer het Weeuken ofte Meyt
Achter de Kerck, ghy weet wel selfs waer toe dagh leyt.
Roel.
Ick segh u May, ghy zijt voor geen een gat te vangen:
En zijt soo loos alst hout daer den Dief aen moet hanghen.
May.
Noch weet ick vry wel meer: maer ’tdient niet al gheseyt,
Op dat hy my niet flus lustich ter Koor en leyt.
Want tis een mensch, wanneer hy heeft sijn gelt versoopen:
Of by de Hoeren snoot, al wat hy heeft, verloopen:
Hy kijft, hy bijt, hy smijt, al wat in huys is beeft:
Ia selfs sijn Vrouw’ by hem niet een bly uer en heeft.
Ick soud’ noch wel veel meer van desen deugh niet segghen,
Maer t’onsent, vrees ick, sal d’Roed in de pisse legghen,
Roel.
Tis langh genoech gepraet. Mijn Heer is oock wel goet,
Maer toorent alsmen op sijn goetheyt steets quaet doet
May.
En mijn Vrouw’ die kan haest op haer peertjen raken.
Roel.
Dats maer een Noorde buy, die kan gheen quaet weer maken.
|
|