Medicina, boek van medicinen

¶ Van dat orine belet si.

Stranwiria. es ene ziecheit dat die mensce niet en mach gelosen van sire orinen no cleine no groet. ende es ene ziecheit allene sonder ander dinc. Of het en waren humoren diet daden. Ende dat comt ondertiden .2. siins. Want het comt ondertiden van roder viereger coleren die verbernt dorine waerbi si comt droppende in die blase. Also loopt si druppende vter blasen. Ende dat kent bi harer bitingen ¶ Of si comt van couden humoren alse fleume. & niet van melancolien maer si es naturlijc droge. maer dese coude & wache fleume die verlanget die lacerten van den halse vander blasen. waerbi die blase haer niet en mach wel sluten. & alsoet valt druppende in de blase. also steket nature vut drupende ¶ Ende comet van hitten. dwelke ghi kent bider hitten & bider bitinge die es jnt conduut vander blasen. entie stede geswollen. ende bi dattie orine es geuarwt root ¶ Ende comet van fleumen. dat kent bider ongeuarwder orinen

[p. 130]

& bi harer dunheit ¶ Ende comet van hitten so doet den zieken laten onder den enckel binnens voets. Ende digereert sine humoren met oxisaccarum Ende daerna purgeert met elcunarium de succo rosarum. Dies derds dages baedtene in watere daer in gesoden es hertstonge ende enduue. Ende men geue hem ten vutgane rubea trosiscata. Ende dies ander dages daerna doetem laten onder den enckel vanden andren voete. Ende daerna so gef hem elx dages nuchtens & nauens dyaprunus geminct met sukere vyolaet. Ende daer op drinke cyroop dat gescreuen es jnt capittel van dyabetica. Ende men smere hem vanden nauele toten fondamente met olien van violetten die si geminct met aysine. Ende daer op legt .1. plaster dat gemaect si van donrebaer van nachtscaden. Ende men werpe hem in der manlicheit warm melc geminct met olien van violetten. met .1. cyriengien. ¶ Ende comet van couden humoren. so digereertse met oximel. & purgeertse met benedicten Des derds dages so baedtene in watere daer alsene in es gesoden & mente & rute & dieregelike. Ten vutganc van den bade so gef hem drinken teracle geminct met wine daer in gesoden si castorie. Dies ander dages so doetem laten alsoet vorseit es. Ende smeertene met .1. zaluen die men heet agrippa. & gietet hem in ter roeden met .1. argape. dats ene cyringie. Ende teracle gesoden met sape van menten & dan geziet. Ende gef hem nutten nuchtens & nauens zingiber alexan drinker met elcunarium ducis ¶ Daer na gef hem drinken dit cyroop tote hi genesen es. Rp radices brionie. centum grana. pionie. mente coquantur in aqua colatura admissentur mel rubea & cyrupere in fine decoctionis apponatur puluis castorei

[p. 131]

mirre & zuccarum. & fiat cyrupus ¶ Dese vore screuen cure machmen doen dengenen die tsnachts pissen in haer bedde. Ende oec dien die geplasmeert siin in den hals vander blasen. & dat daer toe hoort.