Medicina, boek van medicinen

¶ Van Cortten ademe

Asma es ene ziecheit dat de mensce niet wel en mach verademen. dats dat hi niet wel en mach sinen adem in halen no vte steken ende dit comt bi .2. redenen. of bi droochten of bi wacheiden. Die comt van droochten dat wert dattie longere niet gerect en mach ontdoen bi den welken si blijft cleuende te gadre Alst comt van wacheiden. dan en mach die longere niet roeren van belemmertheiden die omtrent hare es ¶ Dits teken van dien die comen van droochten. droge hoeste. die lichame mager entie hals cleine. dorst. die tonge rv. entie ziecheit binnen. Ende alse hi mach inhalen enege wacheit metten ademen. dat helpt hem wel ¶ Comet van wacheiden. die hebben gerne den reume. entie verlichte alsi enege dinc mogen vut werpen. entien helpt warme lucht ende die nes niet also mager alse dandere maniere ¶ Dits die raet die men hier toe raden die meesters van

[p. 84]

medicinen. smeert hem die borst dient comt van couden so dat hi moet hoesten bi crachte met olien van bayen. Of nette spoengie in olie van oliuen entie bint hem optie borst. & dect den zieken op .1. bedde so dat hi swete. Ende gef hem drinken [wine] daer in es gesoden polioen. comijn. calamintum. Of water daer in es gesoden puur tarwe. dit gegeuen dat sal den zieken wel helpen ¶ Comt die hoeste van droochten. so gef hem dyadragantum. dyapenidiom. electuarium ad restaurandum humiditates. Ende gef hem drinken dese tyseine. Nemt wel gesuuerde gerste entie wel gedwegen .1. pinte vol ende daer op giet .3. pecket waters. & .5. wortelen van ricolissien elc .2. palmen lac (l. lanc) no vanden minsten no vanden meesten. ende dit wel gesuuert ende gestoten. ende s. dr. rosinen die stene vte gedaen ende .s. lb. figen van caynile. dat siin grote vette figen. ende s. lb. ysopen. dragant. gomme van arabien. van elken s. dr. dat doet al te gadre zieden in dat vorseide water datter maer en bliue .2. pecket. dit drinke dicken dat wert hem profitelec. Met deser ziecheit comt dicken die artetyke. & essi veroudert so nes si niet geneselijc.