Cyrurgie

Cap. 27.
¶ Van de(n) diescinkele¹⁾.

Dat die dyescinkel es .1. led .2. spannen lanc bogende bi naturen eens deels ront mer in de middewert eist ronst ende cleinst ende daer breket liefst ontwee. jegen daer dbeen cleinst es bi naturen. daer eist tfleesch meest omme. daer bi es ment sculdech te walkene want bi den walkene voeget deen been iegen dandere dat mens te bat seker es daer bi te blivene met gemake. Die scroden die men daer omme wint conforteren dbeen datter bi vergadert ende cnoopt. Elke scrode die es sculdech niet langer te sine dan .2. ½. spanne. daer omme dat dbeen cranc es ende niet en mach gedogen vele handelingen. ten vermakene ontdoet men die scroden boven ende leggense over elke side neder van den bene ende so blivet dbeen liggende te gemake biden scroden. dat niet en soude mogen wesen wilde mer lange scroden om winden bi mense af soude moeten doen te vermakene soude men dbeen verporren biden ontwindene. dat daerbi dbeen lichte mochte comen uut siere steden ende die gene soude manc bliven gaende. Hier bi prijst Actor bat die corte scroden dan die lange. ¶ Ten .12.sten dage alse men daer toe comt te merkene oft dbeen rechte leget ende effene. Ende eist dat an deen side hoger leget dan an dandere. of oneffender es bi der broken dan ane .1. ander stede te ziene biden bene eldre. Men es sculdech een cusseneel van linen cledren daer iegen te leggene. te perssene dbeen nederwert in sine sceppenisse te bringene daer omme .1. cirone. Men mach dat cusseneel also wel boven der cironen doen alse daer onder. ¶ Men es die scroden diere boven siin sculdech te leggen wech

diere genet waren int wit vanden⁺ eye achter den .12.sten dach. Voortmeer es mense altoes sculdech te nettene in wine of in watere uutgeperst. boven der cironen gewonden .1. vilt. daer boven spalken so vele dat mer late spacie tusscen elker spalken die breide van ere spalken omme dat dbeen daerbi lucht mach hebben. Waert dat men so vele spalken om dbeen dade. dat de vilt daermede bedect ware. so ware dbeen in groeter avonturen. want het mochte ontsteken. Ende en bluschte men niet dat vier te tide. die mensce mochter

1) De hoofdstukken 27 en 28 ontbreken in G.

+ B 145c.

[p. 161]

omme sterven of verliesen dbeen beneden dat knie. ¶ Ende dbeen en es men niet sculdech te porne vor den .12.sten dach. want port ment eer. men maect den zieken nuwe pine. ende dbeen en mach niet vergadren om dat ment so dicken verhandelt. Het es gesciet datmen dbeen so dicken heeft verhandelt dat niet en mochte vergadren. Alse die gene waende gaen ende genesen siin. dat been hinc ane hem slaende een sins ende andersins alse een vlegel.