Gheestelijcke liedekens

[fol. 2r]

Den Neder-duytschen Ghemeynten in allen plaetsen daer sy den naem des Heeren Jesu aenroepen, Ghenade ende vrede van Godt den Vader, door den seluen onsen Heere Jesum Christum.

GHeliefde Broeders, gelijck mijn ghevvoonte is somvvijlen eenighe goede sententien vvt de predicatien der Dienaren Gods op te teeckenen, ende te huys by een te versamelen, tot mijnen ghebruycke, (het vvelcke ick seer profijtelijc vinde.) Alsoo is het gheschiet dat ick den 14. Iunij laestleden, hoorende de predicatie mijnes lieues broeders ende mededienaers Georgij Wibotij vvt het vijfde Capittel des Euangeliums Iohannis terstont inden beghintsel gheroert vverde op te teekenen alsulcke leeringhe als ick daer hoorde: Ende dat doende, vvt dien dat my de selue sijne Predicatie al voort ende voort seer vvel beuiel, voornemelijc om dat hy so vele dvvalingen vvt so vveynich vvoorden vvederleyde, so en conde ick niet ophouden met alleenlijck sommige sententien na mijne gevvoonte op te teeckenen, maer vvert bevveecht de gantsche predicatie op te schrijuen, het vvelck ick ooc dede totten laetsten toe, niet alleene in de substantie, maer

[fol. 2v]

oock na sijne eygen vvtgesproken vvoorden, so vele het my mogelijck vvas: Daerentusschen weynich vvetende ofte denckende dat het sijne laetste predicatie vvesen soude. Ende nae dien het nv den Heere alsoo belieft heeft, dat hy den seluen onsen lieuen Broeder vvt dit iammerdal in sijn heerlijckheydt gheroepen heeft, ende ick na sijn ouerlijden gesien ende gehoort hebbe, dat vele godsalighe Broeders ende Susters seer begheerich gevveest sijn om yet van haren lieuen Herder te hebben tot een gedachtenisse des selfs, soo hebbe ick by my seluen ghedacht, datmen niet beter een yegelijcks begheerte voldoen en conde, dan met dese sijne laetste vermaen-vvoorden in drucke te laten vvtgaen ende te verbreyden, ende alsoo den bedroefden Nederlantschen Ghemeynten als voor een Testament van sijnent vveghe te schencken: het vvelcke ooc mijne medebroederen na onderlinghe beraetslaginghe goet ende nut geuonden hebben. Neemt dan Broeders, in dancke onsen arbeyt, de vvelcke tot uvven besten, ende tot gedachtenisse onses lieuen Mededienaers ghedaen is, ende vaert vvel. Te Londen, Den 26. Octob. 1576.

V. L. Broeder in den Heere.

Iohannes Cubus.