Bedevaart naar Jerusalem in 1525
(1884)–Arent Willemsz–
[pagina 27]
| |
domme ende vul machts. Al hadt ic hondert tonghen ende hondert monden Ende een yseren stemme, soe en mach icks niet wtspreken. Nota. Die stadt van veneetgien leyt ronts om int water, ghij moechter soe wel bij daghe in als bij nachte ende bij nachte als bij daghe, want daer en sijn gheen poorten. Nota. Het wert genoomt het grote derp, omdat sij niemant en ontsyen, turck noch heyen noch kersten, wantmen daer niet te lande an comen en mach Ende mit ghene grote gheladen schepen wantet rondts om veneetgien seer ondyep is ende die huysen sijn alle te samen bij na casteels ghewijs. Item Te veneetgien sijn die straten seer nauwe ende bedampt alsoe datter ghemeenliken gheen drie menschen en moghen neffens malkanderen ghaen, alsoe dat een sijn selven moet strecken teghens der mueren sal hij anders den anderen moghen wijken, alsoe dit een grote bangheyt ende benautheyt ende quade lucht maeckt voerden ghenen dies niet ghewoen en sijn, twellick ic wel beproefden. Item Men en mach veneetgien niet al doer ghaen, want die huysen al meest van voren ofte van afteren int water staen, op balckens ofte dier gheliken ghefundeert, alsoe dattet volck van die een strate tot die ander strate daer sij wesen willen soe gheringhe niet comen en moghen Waer doer die barcken alle menschen aldaer van noode sijn Ende daer om varen deser barcken doer die stadt daghelicks wel .xvij. dusent. Nota. Dese barcken sijn al overdeckt mit tapesserie ofte zwart laken ofte mit ghruen laken ende den bodem is becleet al mit schoen with lindelaken daer ghij seer reynliken op sith, Ende varen seer snel doert water Ende die schippers van desen scheepkijns sijn seer lustich ende fray ghecleet, het mach een lusten diet sicht. Item In die stadt van veneetgien sijn brugghen, stenen ende houten over die xxxc. nochtans en bates niet isset dat ghij in die een strate | |
[pagina 28]
| |
ofte in die ander subiteliken wesen wilt, soe is v van noode die barck. Nota. Als veneetgien voortijts op sijn alder beste floer was, plaghen enyghe huysen te ghelden, bijsonder dat duytsche huus, .c. ducatens daeghs, als ons gheseyt wert Ende nv ter tijt alsset oorloch is, soe gheltet duytsche huus tsiaers .lx. dusent ducaten tsiaers ende alsset gheen oorloch en is soe gheltet tsiaers .cc. ducaten tsiaers Ende tot duytsche huus ghebruyckt men toe .xiiij. dusent slotelen. |
|