t'Vermaeck der jeught
(1612)–Boudewijn Jansen Wellens–
AuteursrechtvrijOp de wijse: Gheeft my te drincken nae mijnen dorst.
FRaneker in u begrijp playsant
Bent ghy seer lustich ende schoone.
V straten zijn reyn aen elcken cant,
Seer cierelijck staen sy ten thoone,
Met schoone wateren ydoone,
Soomen aenmercken mach nu ter tijt:
In cuyscheyt soo spant ghy de croone
Boven de Steden in Frijslant wijt.
Repryse.
Franeker schoon// ghy staet ten toon
Lustich en seer playsant// men vant
Int Vriessche pleyn// noyt stadt soo reyn:
Dies ghy de croone spant.
Een Stadt-huys sietmen in u seer jent
Ghetimmert constich, tot elcx vermaken,
Verciert met stenen excelent,
Vraey uyt ghehouwen, hoort dese saken,
Om in justitie recht te waken,
Al soot een stede oock wel betaemt,
Op dat niemant u soude laken,
Oft met onrecht worden gheblaemt.
Een schoon stadthuys// vvaer in t’abuys
Der Burghers vvort gheslecht// oprecht
Soo dat niemant// als t’onverstant,
Tot u naedeel yet seght.
Oock, als men op uwe Vesten gaet,
Soo bent ghy lustich int aenschouwen:
Want seer vele hoven delicaet
| |
[pagina 142]
| |
Die sietmen daer, wilt dit onthouwen,
Dies mach iksck vry sonder verflouwen
Wel prysen, uwe wellusticheyt:
Want ghy zijt seer playsant in trouwen,
Soo elck can mercken met goet bescheyt.
Aen Fest, oft Wal// ist over al
Verciert, met menich hof:// vvaer of
Comt, dat ick moet// met reden goet,
V naem toe schrieven lof.
Noch sietmen tot u vermeeren goet,
De Gheleertheyt tot uwer eeren.
Professoors hebt ghy seer vroet,
Om elck in Talen wel te leren:
Dus sietmen neerst’lijck studeren,
De Gheleertheyt tot elck termijn:
Hierom moet ick my tot u lof keren,
En u eere verbreyden fijn.
Noch tot u eer// sietmen hoe seer
Geleertheyts const hier bloeyt// en groeyt:
Dies haer de Faem// u lof-baer naem
VVijt uyt te breyden spoet.
Prince zoud’ ick recht (my wel verstaet)
Franekers schoonheyt gaen verclaren,
En elck wel stellen in zijnen graet,
t’Zoude my al te seer beswaren:
Daerom wil ick’t nu laten varen,
En maken hier af nu een ent,
En bidden Godt dat hy wil sparen
Franeker al-tijt Eloquent.
P. A.
O hoogsten Prins// mijn beed’/ en vvins
Is, dat ghy dese Stadt// en vvat
Daer binnen vvoont// u g’nade thoon.
Om kiesen t’beste schat.
Verkiest het Beste.
Berispen quaet// hoet gaet,
Is yder een// ghemeen:
Maer als de daet// aenstaet,
Vintmen nau tween// die deen.
|
|