Verclaeringhe vande tafele der naervolghende tye caerte, midtsgaders vallinghe van stroomen opde selue streken vanden compasse.
INden eersten salmen weten dat alle de plaetsen (daert op eene streke ghetye maect) byden anderen ghevoecht staen, t'welckmen also volgende op uyren ende minuten rekenen mach. D'eerste Columne beduyt den dach op welcke de Maen vande Sonne ontfanct, ofte scheydt, de tweede ende derde wijsen de uyren ende minuten, tot welcke plaetse datse hooch water maken, tot een exempel. Als de Mane ontfanct ofte vol is hebt ghy tot Enchusen ende alle de voorschreuen plaetsen in een perck inde tafel byden anderen op Zuyden ende Noorden aengeteeckent, ten twaelf uyren hooch water. Die Maen een etmael out zijnde salt daer hooch water wesen ten twaelf uyren ende xlv. minuten. Ende twee etmalen out zijnde is ter seluer plaetsen hooch water ten een uyre ende xxx. minuten. De Mane drie etmael out zijnde ist daer hooch water ten twee uyren ende xv. minuten. Ende vier etmalen out, hooch water ten drie uyren net, So is de Mane alsdan out een half quartier. Een quartier out wesende salt opde voors. plaetsen hooch water zijn t'sauonts ende smorghens ten ses uyren. Ende sult voorts weten dat de Mane alle etmalen vande Sonne verspaeyt ofte aerselingt xlv. minuten van een uyre (ofte wel so vele) ende t' sestich maecken een uyre, bedragende xlv. minuten drie quartieren van een uyre. Waer uyt ghy de ghetijden lichtelijck tot allen plaetsen, met weynich moeyten condt rekenen.
Alsomen den xv. dach een streke vanden Compas den volle Maen moet toegheuen, is d'oorsaecke datter zijn xxxij. streken ende maer xxx. daghen. Soe ist datmen in dese tafel der waterghetijden den xv. dach weder vande nieuwe ofte volle Maen moeten beghinnen t'ghetye te rekenen ende sal alsdan t'halue quartier Maens opt zuydtwesten ende noortoosten ten drie uyren altijt so des morghens als t'sauonts hooch water wesen. Ende opt gheheele quartier met een oost ende weste Maen, ten ses uyren smorgens als oock t'sauonts. Ende op dese maniere worden die watergetijden byde Zee-varende luyden daghelijcx gherekent ende ghebruyckt.
Auteursrechtelijk beschermd
