Verclaringhe hoemen een perfecte pascaerte maecken ende ghebruycken sal.
EErst salmen met een grooten Passer een ronde Circule slaen, ende die perfectelijk aen vieren deelen, ende een cruyce daer door trecken, af teeckenende: daer na de selue quartieren wederom in vier gelijcke deelen, makende te samen xvj. Compassen. Trect daer nae de Linien van Oost, West, Zuyden ende Noorden aldereerst: T'selue ghedaen sijnde, sult trecken de linien van Zuydtoost, Noordtwest, Zuydtwest ende Noordtoost. Voorts de linien van West zuydtwest, Zuydt zuydtoost, Noordt noordtwest ende Zuydt zuydtwest. Ende daer nae de quartier streken, te weten West ten zuyden, Zuyden ten westen, ende dat vant een Compas tottet ander, soo langhe alle Compassen af gheliniet sullen zijn.
V Pascaerte alsoo vol gheliniet sijnde, sult alsdan nemen eenen perfecten patroon van een Pascaerte, t'selfde vastmaken onder v gheliniede velle, de linien op den anderen responderende: sult die alsdan op een glas teghen t'licht stellen, omme v Caerte alsoo perfectelijcken af te teeckenen, met een lootken om daer na alle t'selue met een penne perfectelijck na te trecken, soo sal v Caerte alsdan autentijck ende volmaect sijn.
Die Caerte voleijnt ende afghemaect, om de selue alsdan recht te ghebruycken. Salmen weten, soo yemant begheerde van Lysaert oft Heyssant af te zeylen naer Spaingnen of Tercera (een van de Vlaemsche Eijlanden) sal nemen de streke daer toe dienende: settende een sticke soo verre als hy hem ghist, buyten een van dese Landen te wesen, op dat hy van dien sticke beginnen mach, settende sijn Cours Zuydtwest, oft Zuydtwest ten zuyden tot een oft twee Etmalen zeylens toe. Soo sal hy alsdan nemen twee Passers, met d'een de mylen metende die hy ghist gezeylt te hebben. Ende met den anderen Passer lancx t'Compasse strijckende de Cours die hy ghezeylt heeft tot dat de voeten van de Passers aen den anderen comen, daer weder een sticke met eenen scherpen Passer oft plompe naelde settende, soo datment met crijt wederom wt doen can.
Oft ghebuerde dat ghy op een ander streke zeylde, t'sy Zuydt zuydtwest, oft West zuydtwest t'selfste sult ghy in v memorie onthouden, wat ghy op desen oft d'ander streke ghezeylt oft behouden hebt, so moet ghy somtijts v Loot lijne, met een hout oft anders achter wt laten gaen, ende setten v Compasse achter om hooghe, ende sien by de linie lancx wat v Schip wraect oft vanden golffuen af gheworpen wert, op dat ghy gheen quade ghissinghe en maeckt, t'selue ghedaen wesende, so neemt van v sticke af de mylen met den eenen Passer, ende met den anderen de Course die ghy ghezeylt oft gheuaren hebt, daer weder een sticke stellende, ende also voortaen. Want op wat streke vant Compasse dat ghy zeylt, so sult ghy den eenen voet vanden Passer setten op de naeste streke in v Caerte die ghy
Auteursrechtelijk beschermd