up gheriemt, ende de derde partye quamen ter poorten uute, daer de Franchoisen jeghens quamen schermutsen met al huerlieder macht, ende die twee andere sloeghen van achtere in de steert, so dat de Franchoisen niet en wisten waer vlieden, in dewelke vlucht groote menichte van Franchoisen versleghen waren, dies den coninck van Vranckerijcke de vlucht nam tot Malte over de brugghe, ende hy sach de steercte van der stad anne, ende de schoone landauwe, ende swoer dat hy synen legher niet eer lichten en soude voor dat de stad van Ghendt gheraseert ware, waeromme den conynck groote macht van Franchoisen ontboot uut Vranckerijcke om de stad van Ghent met gheweldighe stormen in te nemen.
De Gandoisen seer verblijt sijnde van de victorie, ende dat sy alsnoch sonder groot verlies van volcke in 't voordeel waren, hebben al het goet der Franchoisen, dat sy te Ste Pieters vonden in huerlieder schepen ghedreghen als buudt ende den ruters-knechten ghedeelt, want daer waren wel vijf duusent Franchoisen bleven.
Omme welck groot verlies den conynck van Franckrijc was dreeghende de stede van Ghendt te raseren eer den vijften dach lyden soude, ende gheboot elcken sijn logiest te maken te Maelte over de brugghe, ende sijn tente dedy slaen daer nu Ste Denijs-keercke staet, welcke keercke hy dede maken, als hy ansach dat de stede was qualic winnelic, ende daer te blyven ligghen tot dat de stede verhonghert ofte ghewonnen soude sijn, dwelck hy sorchde dat langhe dueren soude, alsoo 't ooc dede, want hi daer meer dan vij jaren voren lach ende en conste se noch niet ghewinnen, dwelc hem seere verdroot.
Auteursrechtvrij