Hoe dat de iij conynghen een verbont maken Ghend te raseren.
Maer als den coninc den brief ghelesen hadde, die hem den grave Aernaut ghesonden hadde, so waende hy by na verroet te werdene, ende swoer dat hy 't up Vlaendren wreken soude, ende op den grave Aernaut soude hy de innobediencie, die hy hem ghetoocht hadde ooc wreken, schelijcx swoer ooc den conynck van Inghelant synen sweer, ende ontboden den conynck van Scotlant, van den welcken sy hulpe ende secoers begheerden omme den voornoemden grave ende sijn lant ter obediencie te brynghen, hem seggende dat den grave Aernaut groot ghewelt hadde ghedaen op den coopman van Scotlant, uut welcke den voornoemde conync mede seghelde ende beloofde hemlien beede ter hulpe te commen, ende te wreecken de overdaet van den grave Aernaut, ende ghinghen huerlieder ghereet maken om met grooter heercracht in Vlaendren te commen, van volcke, van wapenen ende artylgerie, dwelck ic hier laten wille.
Auteursrechtvrij