Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
AuteursrechtvrijEen Enghelsche voys: Van t'Schoenlapperken.
Nv Echo die so menichmael
Ghegeckt hebt met mijn clachten
| |
[pagina 93]
| |
Als ick mijn lyden en mijn quael
Met suchten ginck versachten:
t' Was Aigle Aigle over al
Dat door dat bosschen gierde daer, en tierde naer
Mijn jammerlijck gheschal.
Ghy hebt nu Echo eens besien
Mijn Nimphe wel te deeghen
Hoe dat ghy haer voor mijn saecht vlien
Jn dese groene weeghen
Als zy deed' met een snelle loop
Dat fray gecruifde blonde haar,, ontbonden naar
Sach sweven over hoop.
Denckt of haer blancke kaecxkens net
Die met een ronde bloosken
Jnt midden zijn soo soet beset
Als een twee verwich roosken
Niet zijn die stroom van traanen waert
Die laes uyt mijn verwonnen ooch, gheronnen tooch
Met een soo snellen vaert.
Denckt of dat soete ooch ghetint
Dat zy op my doet dalen
Niet waerdich is te zijn bemint,
Door hare soete stralen
Denckt of dat lieflijck weesen fier
Dat so soet ende aerdich is,, niet waerdich is
Een soo ghetrouwe vier.
O Echo die wel licht versint
Jn u verwonnen herte
Wat zy te minnen onbemint
Want ghy met grooter smerte
Narsis beminde die u vloot
Waer door men siet in plecken schu, bedeken u
Nu schaemt en schande groot.
Helpt mijn vermeeren mijn misbaer
Myn suchten en myn weenen
Op dat myn nimph myn clachten swaer
Mach hooren en mijn steenen:
Dat bosch toch over al vervult
Op dat zy eens becooren mach, en hooren mach
Myn suchten onverdult
Princesse Echo cundt ghy dan,
Het steenen hardt versachten
Van haer die my verlossen can,
Van mijn gheween en clachten
| |
[pagina 94]
| |
Een lofsanck tot u dienst te loon,
Jnt endt van mijn bedwonghen hert
Ghesonghen wert
Een ijghelijck ten thoon.
|
|