Nieu lied
op de voys: Fortuyn Anglois.
Cvpido cleen,, wie gheeft u sulcken macht
Dat ghy alleen,, benemen moght mijn kracht,
V booghsken fijn,, ras op een ander stelt,
En laet my zijn,, in vryheydt onghequelt.
Comt ghy int velt,, met sulcken overmoet,
Het is ghewelt,, dat ghy die jonckheyt doet,
Die u bemint,, die doet ghy meest verdriet,
Al heet ghy blint,, my dunct nochtans ghy siet
Wie u ontvliet,, die seynt ghy eenen schicht,
Dat hy te niet,, moet gaen doort schoon gesicht
Van een reyn maeght,, die hy van herten vrijt,
Daer ghy hem jaeght,, door uwen pijl altijt.
Wilt gy met nijt,, u t'onswaerts toonen wreet
Soo wordy quijt,, u dienaers door dit leet,
Men sal u meer,, niet noemen minnaers Got,
Ghy sout dan zeer,, van elcken zijn bespot.
Die u ghebot,, nu volghen na't compas
Die souden tlot,, dan anders worpen ras,
Ten is niet goet,, te hebben sulcken hooft,
Die gantsch verdoet,, zijn dienaers en berooft.
Hierom gelooft,, gy Prins, ghy God van min
So ghy verdooft,, noch eens mijn liefkens sin
En so zy fel,, niet hooren wilt mijn clacht,
Soo keer ick snel,, van u met gantscher macht.
Elck kan falen.
| |
Auteursrechtvrij