Een ander
op de selve voyse: vanden mey , etc.
Daer staet een in mijn hert alleyn
Jck meyn,, de bloem ghepresen,, uytgelesen,
Die in my vloeyt als een Fonteyn
Zeer reyn,, en net van wesen,, opgheresen,
Soo zy my wil,, ghenadigh,, zijn
Jck sal haer stil,, ghestadigh,, zijn
Dat excellent Jonck-vrouwe
Gheen Croon,, soo schoon van Gouwe,, noch Carssouwe
Dat ickse moght aenspreken siet
'tVerdriet,, sou my verlaten,, door 'tsoet praten
| |
Waer sulck liefde oprecht gheschiet
't Kan niet,, dan altoos baten,, sonder haten
Daerom,, segh ick,, der liefden aerdt
Js vrom,, in schick,, die eerlick baert
Liefd en sal niet vercleynen
Twee die malkandren meynen,, als den reynen.
Des Minnaers herte meest verlicht
'tGhesicht van zijn vriendinnen,, deur trou minnen
Alst is in eerbaerheyt ghesticht
Verplicht,, in herten binnen,, in de sinnen
Die sulcke een verkoren,, heeft
Zoo schoon alsser gheboren,, leeft
Die is weerdigh te prysen
Veel eere te bewysen,, met advysen.
Piramus en die schoon Thisbe
Elck de,, zijn liefde blijcken,, met practijcken,
Tot dat het sweert hun hert doorsne
T'onvre,, sonder afwijcken,, of beswijcken
Liefde oprecht,, al totter doot
Bewees den Knecht,, oock d'Jonckvrou bloot
Trouwe was daer ter banen
't Herte beweeght tot tranen,, sulck vermanen.
Och wie sou daerom zijn vriendin
Yet min,, willen verdraghen,, al ist claghen
Daer jonste was, van het begin
den sin,, doet sulcks ghewaghen,, door 't behagen
Daermen altijt,, liefde toe draeght
der liefden strijt int herte knaecht
Soumen sulck een vergheten
Diemen 'sherten secreten,, stil liet weten.
Oorlof Leliken reyn en wit
wilt dit,, ten besten houwen,, fleur der vrouwen
Aen u is niet soo cleynen lidt
't Besit,, mijn hert in trouwen,, door 't aenschouwen.
Want ghy zijt een Fonteyn,, vol vreught
Mijn hoop, mijn troost, mijn reyn,, gheneught,
Neemt dit in danc Princesse, mijn Maistresse.
FINIS.
De bloemkens soet,, zijn maer een tijdt,, int gansche jaer
Maeghdekens vroet,, altoos jolijt,, stichten voorwaer
| |
Auteursrechtvrij