Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
Auteursrechtvrijop de wijse: Met Venus loose treecken.
Wat ist dat my van binnen
Aldus beroert de sinnen
Dit ben ick onghewoon
Want duchten, treuren, klachten
By my altoos vernachten,
En al mijn vreughde doo'n.
Sout ghijt liefd' moghen wesen?
En in my zijn gheresen
| |
[pagina 7]
| |
Door Mijn liefs claer ghesicht?
Zoo wilt haer oock doorschieten
Op datse mach ghenieten
Den brand van uwen schicht.
Werdt zy die me deelachtich
Ick hoop mijn bede clachtich
Sal van haer zijn verhoort,
Soo dat zy dan sal wenden
Van my dees swaer elenden
Met een troostbarigh woordt:
Dat mijn lust kan vernoeghen
O God wout ghy soo voeghen
Na mijn behaghen maer,
Vreese en hoop partyen
Dit baert in my groot lyen,
Om te verdraghen swaer.
Hoop leijt mijn troost te voren,
Maer vreese comt verstoren
die sinnen metter spoed,
doch liefd maect 'thert weer moedich
door 'tpeijnsen overvloedigh
Op mijn liefs reijn ghemoed.
dat my verwect tot vreughden
door de volmaecte deughden
die ick in haer beschou
Och moghtse my ghebeuren
Al mijn verdriet en treuren
Zeer haest verkeeren sou.
Prince.
Princesse lief verkoren
die u trou heeft gheswooren
doch eens weer liefde biet
Op dat hy voor de smerte
Jn zijn liefdraghent herte
V trouwigheyd gheniet.
Wie kant ontvlien? |
|