Chronijcke van Ghendt

XV^c XCVI.

Jnt jaer XV^c XCVI, den XXIII Februari, zoo zijnder ghecommen over de Schelde zeven vrijbuyters, al waer zij binnen de prochie van Ghendtbrugghe een pachthof jn brande ghestecken hebben, dwelck was tgoet daerup woonde eenen Arent van Houcke; ende een wierter af ghevanghen. Ende den XXVI Februari wiert hij ghehanghen.

....Den VI Maerte zoo was te Ghendt upden Coorenhaert onthooft eenen Laurens Symoens, gheseyt Casacke; ende diende onder de compagnie vanden capitein Haugoet. Men seyde dat hij met de capiteins vrauwe wech gheweest (hadde) ende hij wiert met haer ghevanghen. Ende daer quam een bruyt om hem te verbidden, maer hem en mochte gheen gratie gheschien. Ende hij stont meer als twee hueren upde stellaige, al eer hij hem wilde voughen.

[p. 403]

....Jn dit zelve jaer, den XXV Junij, zo es binnen Ghendt ghearriveert onsen nieuwen gouvernuer, ghenaemt Albertus, met gheheel sijnen legher, alsoo hij ontrent Calis gheweest hadde. Desen gouvernuer was ghelogiert jnt hof van S^te Baefs; den prince van Oraingen was ghelogiert jnt huus van Vinderhoute. Upden Coorenaert waeren ghespannen wel XXIIII tenten ende upde Vrijdachmaerct thien tenten; upde Poele drij tenten, al daermen jnne vercocht bier, wijn ende alderande cost, tot huerbuer vande soldaeten. Ende desen gouvernuer was jnne ghehaelt tsachternoens tusschen drijen ende vier hueren, met XII veendelen borghers, die jn hals steerck waeren zeer ontrent XIIII^c, al fray ghemonteert. Ende desen zelven cardinael Albertus voorseyt dede up sente Pieters ende Pauwels dach den XXIIII Junij binnen sente Baefs keercke sijnen jntrey met de processie, ende den bisschop drouch het heylich cruysse tot jnt hof van S^te Baets, gheconvoieert mette apten ende alle andere gheestelicke. Ende quamen alsoo mette voors. gouvernuer met alle zijne heeren met de voors. processie naer de keercke, ende commende ter hendelduere jnne, daer knielde den gouvernuer neder ende daer gaf hem den bisschop het heylich cruysse te cussen; ende ghinghen alsoo jn den coor, daermen de hoochmesse ghinck beghinnen.

Item den X Julij vertrack den bovenschreven gouvernuer uuyt Ghendt ende ghinck ligghen binnen sente Nicolaus, jnt Landt van Waes, want upden VIII July hadde hij de stadt van Hulst doen belegeren ende laghen daervooren zeven weken, want zij quamen over met appoinctemente upden XIX Augustij XV^c XCVI, daerom dat binnen Ghendt de gheheele stede duere schoone gheviert wiert.