Chronijcke van Ghendt

[p. 401]

XV^c XCV.

.....Den V Ougste soo waeren overcommen ontrent LX vrijbuyters, die hemlieden verborghen hadden jn een stick boecquey, de welcke hadden voorghenomen te stecken tvier jn Wondelghem, Muelestede, Everghem ende Muydepoorte, jn dien nacht; maer daer was eenen van hemlieden die hem verloos ende quam jnt nieu Casteel te Ghendt, ende veradverteerdet de capiteynen wat voornemen zijlieden hadden. Den capitein, dat hoorende, heeft den overbringher ghelooft ende terstont heeft drij hondert van sijne soldaeten vanden sijnen ghereet doen maecken ende heeftse doen bespringhen; ende sij hebbender met eenen slaghe van onse soldaeten tot viere dootgeschoten. De vrijbuyters, hoorende dat ons volck met een trompet quam, wierpen huerlieder gheweere neder ende settent up een loopen, vreesende datter peerdevolck was, maer daer en waeren niet meer dan zeven ofte acht peerden om hemlieden vervaert te maecken, alsoot ghebuerde, soo datter neghen vande vrijbuyters ghevanghen waeren ende vele ghequetst. Men seyde ooc datter wel zeven vande vrijbuyters ter plaetsen doot ghesmeten waeren, ende upden voors. V Ougste, saterdach wesende, wierden de voors. neghen ghevanghenen jnnebrocht ende jnt Sauselet upden Coorenaert ghestelt; maer upden wech bleef noch eenen Spaingnaert doot, duer zijn quetsueren, die hij ghecreghen hadde, die wel solempnelick begraven wiert.

Item alsnu smaendachs den VII Ougste daernaer zoo waeren dese neghene vrijbuyters upden Coorenaert gherecht, zeven ghehanghen ende twee verbrant, te weten den eenen Mesdach, van Ghendt, ende den anderen, die met hem verbrant was, was van ontrent Gheertruyenbeerghe, die ooc jn sijn hooft zeere ghequetst was. Dese twee, die verbrant waeren, storfven

[p. 402]

guesghesint, ende dander vijf storfven Rooms catholijc; daerom wierden zij begraven. Ende daer was een vande zeven, die Mesdach zeer beclaechde doen hij quam upden trap vanden Sauselette om te gaen hanghen, siende naer het huuseken, daermen Mesdach jnne verbranden soude, segghende: ‘Mesdach, Mesdach, o povren Mesdach.’

Jn dit zelve jaer, upden XXIII van Decembre, es te Ghendt bijden Raedt van Vlaenderen een tooveresse verbrant, diemen seyde de coninghinne vande tooveressen te sijne. Sij was gheboren van Nienove ende was begraven ten Augustijnen.

....Jn dit bovenschreven jaer upden.... wiert den eersten steen gheleyt van het nieuwe schepenhuus van ghedeele.