Jn dit zelve jaer, den XXI van Septembre, up sente Mattheus dach, tsavons ten thien hueren, stont Sotteghem gheheel jn viere, zoo datter waeren afghebrant bet den twee hondert ende dertich huusen, zonder de keercke, daer de clocken waeren ghesmolten.
Jn dit zelve jaer cochten de vier leden slandts van Vlaenderen de heerlichede van Burcht ende Zwijndrecht bij Andwerpen, streckende tot over de Schelde, zoomen meent, ende moesten daervooren beloven te gheven hondert duysent guldenen ende thaeren laste een onlosselicke keerckelicke rente van XXIIII lib. gr.; dit deden zij eensdeels omdat die van Andwerpen de riviere niet belasten noch pramen en soude, jndien zij zelve die heerlicheyt ghecocht hadden.
Jtem noch jn dit zelve jaer deden schepenen maecken twee hauten heycken, deen hoogher dan dandere, om die te doen draghen gheboufte, diet verdient souden hebben; ende den derden Februarij droech eenen Lieven van Haute, gheseyt Vare, de heycke van up tschepenhuus, uuyt der aerme camere, de Hoochpoort nedere duer de Langhe munte, lancx de Vrijdachmaerct, over den Zantbeerch also weder tot jnt schepenhuus; ende was deerste, diese handtghifte, ende dat van overspel ende om dat hij zijn wijf, maer vier daghen jnt kinderbedde gheleghen hebbende, dede afcommen vanden soldere met een leerken, haer bedwinghende zijn hoere teten te koken ende meer andere rudessen, levende nochtans bijder aelmoessene. Item hadden ooc dese wethouderen doen maecken twee zwaere steenen om hemlieden, diet verdienden, anden hals te hanghen, maer de heycken waeren zoo ghemaect, binnen met een dweerse spurte, dat indien zij zeer wilden gaen, diese drouch, zijn schenen daerjeghens staecken, ende sloten met een ijsere anden hals.
Auteursrecht onbekend