Dit syn X goede boerden

[p. 36]

Ene boerde. VIII.

Ic quam gegaen met liste
Daer ic mijn suete lief wiste;
Ic sprac: ‘Lief, waer biste?
Waet maecste, cacste of piste?’
- ‘Nenic, ic sitte hier bachten een kiste,
Ende rape eyeren uut enen niste;
Mijn hant hebbic beslabd met giste,
Daer ic ene tonne biers omme quiste.’
Si nam enen pot daer si in piste,
Ende werp na mijn hoet, maer si miste.
En waest niet goede boerde, ic bidtste,
Dat ic soe wel quam uten twiste?
Noch haddic liever dat si miste,
Dan si mijn oghen uutpiste:
Het sijn vele goeder boerden diese wiste.