Een ghebet des morghens in het opstaen.
O Barmhertige Hemelsche Uader, ick dancke dy, dat du desen nacht so trouwelick voor my ghewaeckt hebst, dy biddende dat du my verstercken wilt met dynen heyligen Gheest, die my voortaen geleyde, op dat ick desen dach, mitsgaders alle de daghen mijns leuens, bestelle tot alle gherechticheyt ende heylicheyt, Ende wat ick in handen neme, dat mijn ooghe altijt zy, om dyne eere te verbreyden, alle voorspoet mijns handels van dyne segheninghe verwachtende.
Ende op dat ick sulcke ghenade van dy verkrijghe, wil my (volgende dyne beloftenisse, vergheuen alle mijn sonden, die my hertelick leedt zijn. Ende verlicht my mijn herte, op dat ick alle wercken der duysternisse af gheleyt hebbende) als een kint des lichts, in een nieuwicheyt des leuens wandele, in alle godsalicheyt.
Amen.
Auteursrechtvrij