Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

(1561)–Jan Utenhove– rechtenstatus


Misericordiam & iudicium. Psal.Ci.
§ Hier werdt voorghehouden het officy eener Christlicker Ouerheyt, hoe sy haer seluen sal schicken, de boosen verwerpende, end de vroomen aennemende, waerin alle huyßvaders een voorbeeld hebben sick in hueren huyse also aen te stellen.
[Folio 83v]
VAn goedheyt end gherichte Ick wil deghelick dichten, Dy wil ick singhen, Heer, Wyselick wil ick leuen, In oprechtighe weghen, Tot dat du tot my keerst.
[Folio 84r]
Mit oprechten ghemoede, Wilick my voordaen hoeden, Te mynen huysɇ eenpaer, Van d’booß wil ick my myden, Noch dat in ander lyden, Want ick haet’t, gants end gaer. Alle die van dy wycken Haetɇ ick oock desghelycken, So dat niet een van haer By my sal moghen blyuen, Die een booß ghemoed dryuen, Die moeten oock van daer. Ick sal oock niet bekennen Die sick tot schade wennen. Die synen naesten vry, Mit achterklap beschadight, Dien sal ick onghenadigh Verwęrpen verr van my. Die mit grootscheyt beuanghen, End hooghmoed is behanghen, Te lyden waer my pyn. Myn ooghe sal aenmęrcken, Die door t’ghelooue węrcken, Op dat sy by my syn. Die sick onnoosel draghen, Welcke my wel behaghen, Sullen my dienen fyn. Die omgaet mit bedrieghen, Mit spotten end mit lieghen,
[Folio 84v]
Sal in myn huyß niet syn. Męr de boosdaders alle, Wil ick bringhen ten valle, Ouer het gantse land. Op dat de stad des Heeren, Reyn werdɇ, end sick vermeere Gods word, aen allen kant.