26 Psalmen

¶ Ghebedt t’sauendts in’t slapen gaen.

HEmelsche ende bermhertighe Uader, na dat dy ghelieft heeft, den nacht voor de ruste des menschen te scheppen, wil my de ghenade doen, dat ick desen nacht so ruste na den lichaem, dat mijn ziele (mit dyner liefden beuanghen zijnde) altijdt tot dy wake, niet verghetende de groote weldaden,

[p. 71]

die sy van dy ontfanghen heeft, op dat by dien mijn conscientie oock haer gheestelicke ruste hebbe. Ende op dat door te veel slapens, het vleesch tot sonden niet verweckt worde, wil my bystaen mit dynen heylighen Gheest, dat ick teghen alle listen des Duyuels, so na den gheest, als na den lichame onbeuleckt blijue: op dat mijn slapen selfs gheschiede tot dyner eeren. Ende om dies wil dat desen dagh niet voorby is, sonder teghen dy grootelick ghesondight te hebben: ghelijck het nu all bedeckt is, mit de duysternissen, die du nu op der aerden sendst: wil oock (door dyne bermhertigheyt) bedecken alle mijn sonden, op dat ick daer door van dijn aenschijn niet verureemdt worde: door onzen Heere Iesum Christum Amen.