25 Psalmen
(1557)–Jan Utenhove–
Auteursrechtvrij
[pagina 65]
| |
Gheef dat niet bidd’alleyn de mondt
Maer dat het gae van herten grondt.
Gheheylicht dynen name sy,
Dyn wordt ongheualst ons blyue by,
Dat wy oock leuen heylichlick,
Na dynen name werdichlick.
Behoedt ons Heer voor valsche leer,
Dat arm veruoeret volck bekeer.
Dyn Rycke toekomme o Uader goedt,
Hier ende hier nae: dynen trooster soet,
Gheeft ons so Christus ons toesey,
Mit synen gauen menigherley:
Breeckt Sathans tooren end groot ghewalt,
Uoer syn ercheyt dyn kerck’verhalt.
Dynen wille gheschie O Heer ghelyck,
Op eerden als in Hemelryck:
Gheeft ons gheduldt in lydens pyn,
Ghehoorsaem alle sins te syn,
Neemt van ons wech vleesch ende bloedt,
Dat teghen dynen wille doet,
Gheeft ons huyden ons daechlicks broodt,
End wat wy behoeuen in s’lyfs noodt,
Behoedt ons Heer voer twist ende strydt,
Uoer Peste ende oock voer dieren tydt,
Dat wy in goeden vrede staen,
Doet sorgh ende ghiericheyt van ons gaen.
All onse schulden vergheef ons Heer,
Dat sy ons niet bedroeuen meer,
| |
[pagina 66]
| |
So wy oock die ons schuldich syn,
Haer schuldt vergheuen op dit termyn,
Tot haren dienst maeckt ons bereydt,
In rechter liefde end eenicheyt.
Leydt ons Heer in bekoring niet:
Als ons de boose gheest strydt biedt,
Te rechter of ter slincker handt,
Helpt ons dat wy doen wederstandt,
In’t recht betrouwen onbeureest,
Doer dynen trooster den Heylghen Gheest.
Uan alle quaedt verlost ons meer,
In deze bedroefde tyden O Heer.
Beurydt ons van der eewigher doodt,
En troost ons in den lesten noodt.
Doet ons alltydt goedt onderstandt,
Neemt onse sielen in dyne handt.
Amen, dit is het werde waer,
Sterckt ons ghelooue wanckelbaer,
Op dat wy daer niet twyffelen aen,
Of wy sullen dit all ontfaen,
Nae dynen wille, om Christus naem,
Doer welcken ons bede is ghedaen. AMEN.
|
|