Heidelbergse catechismus

Christelicke onderrichtinghe, ghelijck die in kercken ende scholen der cheur vorstelicken Paltz, ghedreuen oft gheleert wort

[fol. 47r]

Een korte forme des Ghebedts, na de Predicatie.

HEere Almachtighe God, en laet dyne heylige eere om onser sonden wille niet gelastert worden, want wy so menichuoudich teghen dy ghesondicht hebben, daermede dat wy dijn heylighe woordt niet ghehoorsaem zijn, ende met onbekentenisse, ondanckbaerheyt, ende murmureren, dynen toorne dagelicx tegen ons verwecken, daerom ghy ons immers billicken straffet. Maer O Heere, weest ghedachtich dyner grooter bermherticheyt, ende ontferme dy onser: gheeft ons bekentenisse ende berou onser sonden, ende beteringhe onses leuens. Sterck dynen Volcke, syne Dienaers ende Ouericheden, dat sy met ghetrouwicheyt ende stantachticheyt dijn woordt prediken, ende dat wereltlicke sweerdt met gherechticheit ende billickheyt voeren: Behoedt ons voor alle valscheyt ende ontrouwe: verstoort alle valsche ende boose raedtslagen, teghen dijn Woordt ende Kercke be-

[fol. 47v]

dacht. O Heere, ontreckt ons niet dynen Gheest ende Woordt, maer geeft ons een warachtich Ghelooue, lijdtsaemheyt, ende stantachticheyt: Koemt dyne Kercke te hulpe, ende verlostse van alle ouerlast, spot, ende tyrannie. Sterct oock alle swacke ende bedroefde herten: ende sendt ons dynen Vrede, door Jesum Christum onsen Heeren, welcke ons dese ghewisse beloftenisse ghedaen heeft: Voorwaer, voorwaer segghe ick v, wat ghy den Vader bidden sult in mynen Name, dat sal hy v gheuen: ende ons daerop also heeft heeten bidden:

Onse Vader, &c.

Wilt ons doch oock geuen stantachticheyt, ende een dagelicks toenemen in het oude, ware, ende onghetwijuelde Christelick Ghelooue: op dat wy door het selue, hoe langher hoe meer, Christi ende aller syner goederen deelachtich worden: Van welcken Gelooue wy bekentenisse doen met monde ende herten, sprekende:

Ick ghelooue aen God, &c.

FINIS.