Heidelbergse catechismus

Christelicke onderrichtinghe, ghelijck die in kercken ende scholen der cheur vorstelicken Paltz, ghedreuen oft gheleert wort

Opentlicke belijdinghe der sonden, ende ghebet voor de Predicacie.

HEmelsche Vader, eewighe ende barmhertighe God, wy bekennen ende belijden voor dyne Godlicke Maiesteyt, dat wy arme ellendighe Sondaers zijn, ontfanghen ende gheboren in alle boosheyt ende verderffenisse, geneycht tot allen

[fol. 42v]

boosen, onnut tot eenigen goeden dinghen: Ende dat wy met onsen sondelicken leuen sonder ophouden dyne heylighe gheboden ouertreden, daer door wy dynen toorne teghen ons verwecken, ende na dynen rechtueerdigen oordeel, op ons laden de eewighe verdoemenisse. Maer O Heere, wy draghen berouwe ende leedtwesen, dat wy dy vertoornt hebben, ende beklaghen ons ende onsen laster, ende begheeren, dat dyne genade te hulpe kome onse ellende ende iammer. Wilt dy doch daeromme ouer ons ontfermen, O alder goedichste God ende Vader, ende ons vergheuen alle onse sonden, door dat heylighe lijden dijns lieuen Soons onses Heeren Jesu Christi: ende wilt ons hier na verleenen de genade dijns heyligen Gheests, die ons onse ongerechticheyt van gantscher herten leere bekennen, dat wy ons seluen mishaghen, op dat de sonde also in ons ghedoodt worde, ende wy in een nieuwe leuen opstaen, in welcken wy rechte ware vruchten der heylicheyt ende gherechticheyt moghen voortbringhen, die dy om Christi willen welbehaghende zijn.

Wilt ons doch oock dijn heylighe Woordt, na dynen Godlicken wille te

[fol. 43r]

verstaen geuen, op dat wy daer wt leeren, alle onse betrouwen op dy alleen te setten, ende van allen Creatueren af trecken. Dat oock onse oude mensche met alle syne lusten, van dach tot dach meer gecruyst worde, ende dat wy ons dy opofferen tot een leuendighe offerhande, ter eeren dijns heyligen Naems, ende opbouwinghe onses Naesten, door onsen Heere Jesum Christum, welcke ons also heeft gheleert te bidden:

Onse Vader, &c.