Heidelbergse catechismus

Christelicke onderrichtinghe, ghelijck die in kercken ende scholen der cheur vorstelicken Paltz, ghedreuen oft gheleert wort

Ghebedt voor den Eten.

ALler ooghen wachten op dy Heere, ende ghy gheeft hen hare spijse tot syner tijdt: ghy doet dyne handt op, ende versadighest allent wat daer leeft, met welbehagen.

HEere Almachtige God, ghy die het alle geschapen hebt, ende noch door dyne Godlicke kracht onderhout, ende dat volck Israel inder Woestijnen gespijst hebt, wilt doch ons dyne arme dienaren, dynen Godlicken seghen ende ghebenedijdinghe gheuen, ende heyligen dese dyne gauen, die wy van dyne milde goedicheyt ontfanghen, op dat wyse matichlick ende heylichlick ghebruycken, na dynen Godlicken wille: ende door sulcke middelen dy bekennen, een Vader ende oorspronck alles goets, ende bysonder soecken, dat Gheestelicke

[fol. 41v]

Broodt dijns Woordts, met welcken onse zielen gespijst worden totten eewighen leuen, dat ghy ons bereydt hebt, door dat heylighe bloedt dijns lieuen Soons onses Heeren Jesu Christi.

Ons Vader. &c.

Also vermaent ons onse Heere Jesus Christus, Luce 21. Hoedet v, dat uwe herten niet beswaert en worden met brassen ende suypen, ene met sorghe der neeringhe, ende kome de dach des Heeren haestich ouer v, gelijck een valstrick.