Catharynisten binnen s'Hertoghen Bosche.
Refereyn.
T'Herte inflammeert my, als ick ben indachtich,
De neersticheyt der Philosophen waerachtich,
Tot een beschaemtheyt en confusie groot,
Ons Christenen, die daer niet en sijn dan prachtich,
Geneycht tot alle boosheyt en sonden snoot,
De heydensche Philosophen leerden ons bloot,
Altijt besich te sijn om elck te stichten,
Cicero, Plato, Pithagoras miniot
Niet doende dan te leeren sonder swichten,
Had Godt haer gedaen, soo hy ons comt verlichten,
Een woort en souden wy niet mogen spreken,
In allen haer manieren, prosen en dichten
Sijn sy leerbaer, nochtans niet sonder gebreken,
Van't Christelijck verstant sijn sy noyt geweken,
Sy en wisten niet beters, hoort hoe Cicero vloet,
Wiens wetenschap van den mensch niet en wordt versteken,
Gheleertheyt vroet,, bouen gelt goet,, loff hebben moet.
DAt geleertheyt gelt en schatten te bouen gaet,
Dat's seeckerlijck, die de reden niet ouer en slaet,
Can dat in alle manieren wel proberen,
In alle rechten haeltmen by de geleertheyt raet,
Waer van de geleertheyt d'waerheyt declareren,
Wat mensch sal met verstant dese blameren,
Daer de Philosophen haeren tijt aenhinghen,
Is Arminius niet ge-eert, wilt gronderen,
By die van penen bouen eenich dinghen,
Zeno wilden anders nergens den mensch toe dwinghen,
Als tot geleertheyt, en dat meest aen alle man,
Den traghen siet men met ledicheyt om-springen,
En sijnen tijt passeren, soo men mercken can,
Wat is een ongeleert mensche ter werelt dan
Nae Pythagoras woort, die sijn neersticheyt doet,
Reden moueert my wel, om niet te scheyden daer van,
Gheleertheyt vroet,, bouen gelt goet,, lof hebben moet.
| |
EEn Orateur die niet wel en is geleert,
Is vande slecht, maer niet vande wijsen ghe-eert,
Siet de daghelijcxse experientie,
Socrates noch Cicero hier niet af en keert,
Maer doet den geleerden assistentie,
Gheeft Aristoteles ander sententie?
Leest sijn leuen en al sijn conuersatie,
Cleantes, Democritus inuentie,
Sy soecken leeringe t'alder spatie,
Zeno seyt, dees const heeft de beste gratie,
Arispus, ornette, die in eeren houwen,
Prijsen de geleertheyt heydensche natie,
Waerom sullen de Christenen dan flouwen,
Dees Orateurs hebbense noyt willen schouwen,
Dies ghy prijsweerdich sijt in allen voorspoet,
Verhalende de reden, die de wijsheyt trouwen,
Gheleertheyt vroet,, bouen gelt goet,, loff hebben moet.
| |
Prince.
DAt ick de geleertheyt Prince voor oogen stel,
Is oorsaeck dat allen Philosophen wel
Neerstich haeren tijt hier mede om-brochten,
Worden Arminius niet blint van sulcken spel,
Die met de Peanen de boecken door-sochten,
Sy dagen ende nachten inde boecken vrochten,
Schrijuen en lesen hadden sy vercoren,
Soo dat sy niet anders hebben en mochten,
Ia Arminius heeft sijn gesicht verloren,
Oft in ons tijden Christenen ghebooren,
Soo ter herten namen om geleertheyt te kinnen,
Daer souder soo veel in dronckenschap niet smoren,
Die alle ledicheyt heden s'daechs beminnen,
Prince hebt de geleertheyt in uwer sinnen,
Want d'onwetentheyt is veel bitterder als roet,
Deur dees scientie wy veel gauen winnen,
Gheleertheyt vroet,, bouen gelt goet,, lof hebben moet.
Wilt Trovw oorboren.
In Weelden siet toe.
|
|
Auteursrechtvrij