De schadt-kiste der philosophen ende poeten

[p. 58]

Nievw liedeken op de wyse;
Int soetste vanden Meye aldaer ick quam gegaen.

Ecce gratia.

CRuel sonder ontfermen
Is mijn lief teghen my,
Goden wilt my beschermen,
Oft k'val in phrenesy,
VVant Cupido moordadich
Is heel op my verstoort,
Venus weest mijns ghenadich,
Mijn bede doch aenhoort.

VVat baedt Orpheus snaren,

Oft Melpomenes sanck,
VVat baedt my t'sMeys verclaren,
Oft voghels schon gheianck?
Soo mijn lief blijft volheirdich,
Versteent in gramschap groot,
Ghelijck Leander veerdich,
Om hero blijf ick doot.

Ghy Musen al ghelijcke

Verlaet Helicons dal,
Treurt met my sonder swijcke,
Maeckt droefheyt ouer al,
Fonteyntens laet v spruyten
Groen Loouers keert dijn jeught,
Breeckt elck dijns vreughs conduyten,
Soo ghy best ceunt oft meught.

Cruypt in Cakus duwieren

Al dat oyt cluchtich was,
Vliet t'wout ghy wilde dieren,
Tot dat t'gheeft ander pas,
O Sol laet af v stralen,
Aensiet mijn ongheluck,
Donckert heel Humus palen,
Om mijn ellendich stuck.

Prince.

Princen ende princessen

VVie sal my gheuen raet,
Mercuri hoort dees lessen,
Seght mijn lief metter daet,
Dat sy my wille gheuen
Een wort van trooste soet,
Soo en koos ick mijn leuen
Gheen meerder schat oft goet.

Ick bav naer den Hemel.