De schadt-kiste der philosophen ende poeten

[p. 51]

Nievw liedeken; op de wyse:
Lieue dochter vol van jeughden.

MErcurius bode ghemeyne
Van die Goden eloquent,
Seght my, wie sidt aen die fonteyne
Van Pegasius excellent?
My dunckt Iupijn is daer omtrent
Met Iuno sijn huysvrouwe reyne,
Neffens haer sidt Venus schoon,
Al met Cupido idoon.

Diana quam ten seluen stonden

Snel gheloopen van die jacht,
Soo sy ghewent was met haer honden,
Voorby het Goden-gheslacht,
Die neghen susters oock met cracht
Quaemen, daer sy die Goden vonden,
En Pallas met vooyse soet
Sanck den lof der Goden goet.

Suffona met haer vinghers teere,

Met Apollo goet van aert,
Amphion nam oock sijnen keere,
En heeft hem by haer ghepaert
Met haer velen seer wel ghesnaert,
Hermogenes seer vol van leere
Quam met Pan daer sitten by,
Die spelden reyn harmony.

Als nu dit hoorden die Naeyaeden

En die Nymphen hups en coen,
Sy liepen stracx, en pluckten blaeden,
VVant den Mey stont saysoen,
T'was Mirtus ende Louwrier groen,
Daer mee bestrooyden sy die paeden,
En eenen crans hinck daer tot prijs,
Voor die best sprack sijn diuijs.

Prince.

Prins wie den prijs daer heeft gecregen,

Sal ick segghen openbaer,
T'was Cicero die niet verleghen
VVas om uyt te sprecken daer
Den heelen lof der Goden claer,
En hy en heeft oock niet versweghen
Rethorica maeght vol vreught,

Ghy Borght ons Persse.