T'saemen-Sprekinghe Tvsschen Mechlinia ende Mercvri
WAt hoor ick voor gerucht hier binnen myne mueren
Van schalmeyen geluyt, en musicaelen sanck,
Myn volck loopt ouer hoop door 'trompetten geclanck.
Daer comt der Goden bod tot my ter goeder vuren.
MECHLINIA weest verblyt, en wilt v niet beruren,
Maer staet v Dochter by, de werdighe PEOEN
Want haer versluyert hooft wort nu wer Root en Groen
Door de eerbiedingh, van de NYMPHKENS v gebueren.
Siet daer den MARI-CRANS met haeren schoonen waeghen,
Waer op sy hen BLASOEN, ter Cameren doen draeghen,
Hier door verdienen sy met recht den hoochsten prys:
En siet daer de GOVT-BLOM (die moet ick me geleyden)
Seer costelyck versiert, my dunckt sy my verbeyden
Dus wil ick gaen, vaert wel.
MARCVRI, blyft wat staen,
Seght my wat comt daer noch voor eenen waeghen aen
Met des lieden te perd, wilt my alles bedieden.
De VILVORTSCHE GOVT-BLOM ist, die om eer te bieden
De Const-Rycke PEOEN, haer nu stelt inde baen.
En wat is dat voor volck, die daer comen gegaen
Met haeren wysen voor, met pypen en schalmeyen
Met DRY BLASOENEN, oock mannen diese geleyen,
'Twaer schaede dat ick dat, met eenen niet en wist.
'T syn CHRISTVS OOGHEN claer die woonen binnen DIST
Die oock cost ofte moyt, en hebben willen spaeren.
Ick ducht dat de PEOEN hier door is in beswaeren
Hoe dat sy best haer eer bewaeren sal daer by;
Hier om soo ist wel recht, dat ick haer hulpich sy.
Op dat gebreck van macht, haer FAEM niet en vermindert
Door vwen bystant kan sulckx licht worden verhindert,
Want quam sy in oneer, het waer v schand en pyn
Wat dunckt v, waert niet goet dat ick haer schanck den wyn?
Om 't REDENRYCK GESLACHT dat haer dus comt genaeken,
Deur BACHVS edel sap wat vrolycker te maeken?
MARCVRI geeft my raet, want ick m'op v betrou.
Dat hebt ghy wel bedacht MECHLINIA schoon vrou,
Maeckt v snel derwaert aen, en thoont v mildicheden,
Vernieut den ouden Lof, van 'tLant-Iuwielsche seden,
V NIMPHEN reyckt de hant, en hoet haer voor misual,
Op dat FAEM vwen prys vercondich ouer al,
En dat ghy wort ge-eert, van RHETORICES benden,
IVPYN laet de PEOEN met liefd haer fest volenden.
TROOST V IN GODT.
|
|
Auteursrechtvrij