Devote oeffeninghe op de vijf lettere van de soete ende alderheylichste namen Iesus ende Maria

[p. 275]

Van het Hoochweerdich alderheylichste Sacrament des Autaers.

Op de wijse: Maximiljanus de Bossu, &c.

Christe waerachtich Pellicaen,
Een Pellicaen ghepresen
Ons vleesch hebt ghy genomen aen,
Ghy wild’ ons broeder wesen:
Ghy hebt u borst open ghedaen,
V bloet hebt ghy uyt laten gaen,
Om ons al te ghenesen.          Ghy, etc.

Ghy zijt voorwaer dat eeuwich broot,

Fonteyn van ‘teeuwig leven
Al zijn wy naer de siele doot,
Door u soo wort verdreven
Alle ghebreck, en alle noot:
Die u ontfanght, al is hy bloot,
Rijckdom wort hem ghegheven.          Alle, etc.

[p. 276]

 

O soeten Heer’, o Vader goet,

 

O Heere der heyr-krachten,

 

Ghy komt betalen Adams boet,

 

Verlossen all’ gheslachten:

 

Maer Heer hoe schinckt ghy overvloet,

 

V precieus en dierbaer bloet!

 

Och laet ons dat groot achten.          Maer, etc.

 

’tIs een waerachtich Sacrament,

 

Dat Iesus selfs instelde,

 

Eer dat begonst sijn groot torment,

 

In’t klaer hy dat vertelde,

 

Dat is een spijs seer excellent,

 

Neemt nut mijn lichaem ongheschent,

 

Aldus hy dat bevelde.          Dit is, etc.

 

O Iesu zijt ghebenedijt,

 

Dat door vijf woorden krachtich,

 

Een suyver broot sonder respijt

 

Wort u persoon waerachtich:

 

Ketters die ongheloovich zijt

 

Weest toch ghedachtich t’allen tijt,

 

Dat Godts woort is almachtich.          Ketters, etc.