Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijop de wijse van den 23. Psalm: Mijn Godt voeyt, my als mijn Herder ghepresen, &c.VRienden ghemeyn,
Laet u door Godts geest raden,
Groot ende cleyn,
Wilt wandelen op zijn paden,
| |
[Folio O6r]
| |
Sijn Voetstappen nae gaen,
En die recht hene treden,
Nae zijn vermaen,
Schickt u daer me te vreden,
Want hy heeft met bescheyt,
De zijne sulcx te vooren,
Door zijn woort verbreyt,
Ende wel laten hooren.
Lucas schrijft bequaem,
Int tweede nae behoorte,
Van Christus Lichaem,
En oock van zijn gheboorte,
Hoe datter op dat pas,
Soo gaet hy ons vermonden,
Geene plaetse en was,
In der Herberghe ghevonden,
Dan u hy verbreyt,
Hoe dat hy was ten stonden,
In een Crebbe gheleyt,
En in doecken ghewonden,
Oock doet ons vermaen,
Mattheus soo wy lesen,
Hoe dattet is ghegaen,
Int opwassen nae desen,
Soo dat hy claecht,
Verstaet my nu ten besten,
Ende ghewaecht,
De Voghelen hebben nesten,
Maer Mattheus bediet,
En gaet ons claerlick seggen,
Christus en hadde niet,
Om zijn hooft op te leggen.
| |
[Folio O6v]
| |
Mattheus claer bediet,
Den Vossen hebben holen,
Int achtste siet,
Daer leestmen sulcx ten volen,
Maer Christus niet,
Dan droefheyt en ellende,
Druck en verdriet,
Vant behinsel totten ende,
Mattheus doet vermaen,
Van een Apostel mede,
Die hem heeft verraen,
Ischaryot ter stede,
Paulus ons ghebiet,
Dat wy sauden in desen,
Oock anders niet,
Als Christus ghesint wesen,
Die in nederen staet,
Is als een Knecht bevonden,
Oock ant ghelaet,
Soo Paulus gaet vermonden,
Heeft hem verneert,
Van boven afghecomen,
Soo Johannes leert,
Int achste sonder schromen.
Noch leestmen met bescheyt,
Hoe dat Christus tot versoeten,
In vernederheyt,
Wiesch de Apostelen de voeten,
En heeft ons ghemeyn,
Een Exempel na ghelaten,
Om t'onderhauden alleyn,
Aen zijn vrome Lijdtmaten,
| |
[Folio O7r]
| |
Want zijn ghemeente hier,
Heeft hy dat als bekende,
Gheboden dees manier,
t'Onderhauden totten ende.
Noch schrijft Paulus claer,
Dat de Schrift sonder sneven,
Den Menschen aldaer,
Is tot leeringhe ghegeven,
Tot straffinghe eenpaer,
En tot beteringhe mede,
Tot onderwijsinghe claer,
Inder gherechtichede,
Dat een Mensche van Godt,
Wilt hier wel op mercken,
Sy bereyt voor een slodt,
Tot alle goede wercken.
Die onder u wilt zijn,
De meeste soo wy lesen,
Moet tot elck termijn,
Haer alder dienaer wesen,
Die hem vernedert hier,
Die worden naer verheven,
Men leest op dees manier,
In Mattheus gheschreven,
Want doen Christus heeft verkeert,
By zijn discipelen reyne,
Heeft hy sy soo gheleert,
Onderhouden ghemeyne.
Christus onsen vrient,
Heeft zijn discipelen mede,
Selve ghedient,
Al in vernederthede,
| |
[Folio O7v]
| |
Hoe wel hy met recht,
De meeste is tallen stonden,
Is als een knecht,
In nederheyt bevonden,
En leert ons noch claer,
Door schrijven in ghemeyne,
Den grootsten eenpaer,
Te dienen den cleynen.
Dus isset toe ghegaen,
Al in vernedert heden,
Nae Mattheus vermaen,
Voor die laghen in onvreden,
In duyvels ghewelt,
Met doots banden ghebonden,
Die heeft hy vry ghestelt,
Ende verlost van Sonden,
Jae uyt liefden groot,
Na Johannes verclaren,
Sterf hy de doot,
Voor ons arme Sondaren.
Paulus schrijft den sin,
Wy zijn Christus deelachtich,
Ist dat wy niet min,
t'Begin zijns wesen machtich,
Tot t'eynde toe,
Al met een vast betrauwen,
Niet en worden moe,
Maer altijt recht behauwen,
Dus verstaet te recht,
Hoe Christus is vooren ghetreden,
Soo moet den knecht,
Hem oock stellen te vreden.
| |
[Folio O8r]
| |
Oorlof vrienden ghemeyn,
Die arbeyt inden Heere,
Van herten reyn,
Strijt vroom voor Christus Leere,
Hy is ons Capiteyn,
En Vrede-Vorst by namen,
Onsen Herder alleyn,
En laet ons zijn woort niet schamen
Want tis voor een slot,
Soo wy vinden te lesen,
Die hauden zijn ghebot,
Die sullen salich wesen.
Dit is nae mijn bevroeden,
Die God vreesen nemen alle dingen ten goeden.
☞ ☜ |
|