selden eene ghenoegh kloecke hulpe om weder zich op te rechten; Het is dan een groote eer' aen Iosue, den oudsten der Kinderen van Bajazet te hebben uyt de vervallinghen ende verdervinghen vanden staet van sijn Vader wederom op-gherecht door sijne kloeckheyt ende goedt beleydt dese inghestorte heerschappye; ende ick en kan my niet ghenoegh verwonderen van dat eenighe segghen willen dat de selve als-dan was op-gheschorst, ende al-hier willen in-brenghen tot het verwachten vanden wettighen Erfghenaem des-selfs eene tusschen-beyden kommende Regeeringhe; want hy den oudsten zijnde, ende den eersten der Otthomannen, die weder ghewonnen heeft ten tijde selfs van Tamerlanes, een ghedeelte van het ghene hy hun ontweldight hadde verdient wel onder het ghetal der Keysers gherekent te worden, ghemerckt selfs dat hy innam Boura, de hooft-stadt t'anderen tijden van hun heerschappye, waer-in by-naer alles bestondt dat sijne voor-Ouderen in Asien besaten; van daer in Europa over-kommende verrichte soo veel 't zy door liefde, ofte vreese, dat hy wederom onder sijn ghebiedt bracht de volckeren, die het jock vanden hals hadden gheschut. Maer weder-ghekeert zijnde in Asien, sijnen Broeder Musulman, versterckt door den bystandt der Griecken, en met hulp vande Heeren van Sinope, ginck hem bejeghenen in Cappadocien, al-waer hem slagh leverde, hy soo eene volkomen victorie bequam, dat Josue meynende door de vlucht te ontkommen, ghevanghen wierdt, ende voor Musulman ghebracht, die hem dede worghen, hebbende nauwelijckx vier jaeren gheregeert, ende dat met eenen gheduerighen aerbeyt, ende sonder eenighe rust. Eenighe hebben gheseyt dat hy soo groot gheen Oorloghs-man en was als Musulman, 't welck oorsaeck was dat het beste deel van sijn Bevel-hebbers, ende Kryghs-lieden hem af-weken naer sijn Broeder toe; maer ick gheloof dat oogh-merck
Auteursrechtvrij
