Dialectike ofte bewysconst

Definitie XXXVI.

A, beteeckent Generale Betuyghing, E, Generale ontkenning, I, Besonder Betuyghing, O, Besonder Ontkenning.
Verclaringhe.

ALle Propositie des Bewijsredens is, ofte van Generale Betuyghinghe, als, Alle ghedierte leeft, ofte van Generale Ontkenninghe, als, Gheen ghedierte en is doot, Ofte van Besonder Betuyghing, als, Eenich ghedierte is Mensche, Ofte van Besonder Ontkenning, als, Eenich ghedierte en is gheen Mensche. Nu om dese ghedaente der Propositien cortelick te beteeckenen, soo heeft Aristoteles daer toe bequamelick ghenomen dese vier letteren, A, E, I, O, elck bediedende, als de definitie hier boven verclaert. Want ghelijck de cyferletteren, dickmael gherieflicker beteeckenen de ghetalen, dan oftmen die altijt int langhe schreve, alsoo oock hier dese. By exempel:

A	Alle Menche is Sienlick,
I	Eenich dier is Mensche,
I	Eenich dier dan is Sienlick.

Alwaer A ghestelt neven D'eerste Propositie,

[p. 39]

beteeckent die te wesen van Generale Betuyghing: ende I neven d'ander twee, te sijne van Besonder Betuyghing: Tselfde sullen soodanighe letteren bedieden, daer sy hier onder tot verscheyden plaetsen, neven de Bewijsredenen alsoo sullen ghestelt worden.